Stýrið er nýtt veflægt sjókort sem áætlað er að fari formlega í loftið í lok ágúst eða við upphaf nýs fiskveiðiárs. Það stendur til að einblína á sjávarútveg og birta upplýsingar um staðsetningu fiskiskipa af öllum stærðum og gerðum. Hugmyndin varð til í byrjun febrúar á þessu ári og hefur verið hliðarverkefni síðastliðna mánuði. Síðustu helgi fór fyrsta útgáfa af síðunni í loftið í von um að fá inn notendur sem eru tilbúnir til að prófa. „Það er viðkvæmt að fá fólk inn á síðuna á sama tíma og maður veit að hún er ekki 100% tilbúin en öll endurgjöf á þessum tímapunkti skiptir miklu máli upp á þróunina og framhaldið. Það kom skemmtilega á óvart að það voru 7.000 heimsóknir á síðuna síðastliðna viku. Endurgjöfin hefur verið jákvæð og margir ánægðir með framtakið en upplýsingar um mörg þeirra skip sem Stýrið birtir er ekki hægt að nálgast á fríum aðgangi hjá öðrum sambærilegum síðum. Ef vel tekst til þá verður hægt að setja púður í að sækja erlend skip en í dag er áherslan á fiskiskip í íslenskri landhelgi,“ sagði Ingvi Þór Georgsson annar aðstandenda síðunnar en hann ásamt Friðrik Valdimarssyni standa að síðunni. „Við unnum báðir hjá Samtökum fyrirtækja í sjávarútvegi og kynntumst við að gera rannsóknarverkefnið Aukin verðmæti gagna. Við erum báðir í öðrum vinnum í dag. Fyrst um sinn verður vefsíðan rekin á auglýsingum og aðgangi án auglýsinga.“

Verkefnið byggir á upplýsingum úr gervihnöttum. „Það er spennandi og skemmtilegt að sjá leiðir til að hagnýta þau til að fylgjast betur með umferð á sjó og vinna nýja lausn í samvinnu við sjómenn og útgerðir. Áhuginn á því að skoða svona síður er mikill erlendis þó það séu ekki tölur um það hér á landi. Tækifærið felst í að búa til notendavæna lausn sem verður vonandi hluti af morgunrútínunni þar sem sjómenn og áhugamenn í landi fá sér morgunkaffið og kíkja hvar skipin sem búa til verðmætin í landinu eru stödd. Einnig sóttum við um styrk hjá Samgöngustofu til að kortleggja og fylgjast með slysaskráningu út á sjó. Ef það tekst til þá verður hægt að birta myndrænt kort af því hvar og hvenær slysin eru að gerast sem gæti aukið forvarnir á sjó og gert skýrslum um sjóslys aðeins hærra undir höfði. Við vonum að vefsíðan veki lukku meðal sjómanna og útgerða og verði sem flestum að gagni,“ sagði Ingvi Þór að lokum.

www.styrid.is