Athugasemd við athugasemd!

Vegna athugasemda heilbrigðisráðuneytisins sem birtar voru á vef Stjórnarráðsins í gær vilja bæjarstjórar Fjarðabyggðar og Vestmannaeyja koma eftirfarandi á framfæri:

Lög um réttarstöðu starfsmanna við aðilaskipti að fyrirtækjum nr. 72/2002, sem tryggja störf og réttindi starfsfólks við yfirfærslu stofnana milli rekstraraðila, hafa verið látin gilda um tilflutning verkefna milli ríkis og sveitarfélaga. Að bera því við að heilbrigðisráðherra hafi ekki heimild til þess, er útúrsnúningur og ber þess merki að heilbrigðisyfirvöld vilja ekki tryggja hnökralausan tilflutning dvalar- og hjúkrunarheimilanna til ríkisins. Eftir standa rúmlega 140 starfsmenn í óvissu og framtíð þeirra ótrygg.

Auðvelt að beita umræddum lögum þegar það hentar ríkinu, en bera svo við heimildarleysi þegar það hentar ekki
Þegar málefni fatlaðra voru flutt frá ríki til sveitarfélaga voru umrædd lög látin gilda. Þau voru einnig látin gilda þegar hluti starfsfólks hjúkrunarheimilisins á Hornafirði fluttust frá Sveitarfélaginu Hornafirði til Heilbrigðisstofnunar Suðurlands á síðasta ári, sömu stofnunar og mun nú taka við rekstri hjúkrunarheimilisins í Vestmannaeyjum. Þá stóð til að réttarstaða starfsfólks yrði tryggð við tilflutning hjúkrunarheimilisins á Akureyri til Heilbrigðisstofnunar Norðurlands árið 2020, eins og fram kom í sameiginlegri fréttatilkynningu stjórnvalda og umræddra stofnana í ágúst 2020. Það virðist því auðvelt að beita umræddum lögum þegar það hentar ríkinu, en bera svo við heimildarleysi þegar það hentar ekki.

Að bera því svo við að bæjarstjórunum hefði mátt vera það ljóst að lög um réttarstöðu starfsmanna við aðilaskipti að fyrirtækjum ættu ekki við, er hvorki ljóst né regla. Það sanna dæmin hér að ofan og öll þau óljósu skilaboð sem sveitarfélögin fengu um að lögin myndu gilda og ekki gilda, voru ekki til að skýra málið frekar.

Alltaf var gengið út frá því að fólkið héldi störfum sínum
Til upprifjunar: Eftir ítrekaðar en árangurslausar tilraunir til viðræðna við heilbrigðisráðuneytið um viðbótarfé til reksturs hjúkrunarheimila sveitarfélaganna, sem sveitarfélögin hafa árum saman greitt hundruðir milljóna með, var fátt annað í stöðunni en segja upp samningum um rekstur þeirra á. Eftir að uppsagnir á samningi höfðu verið mótteknar af Sjúkratryggingum Íslands (SÍ), gekk illa að fá fundi og svör um yfirfærsluna. Sveitarfélögin þurftu að margganga á eftir upplýsingum og viðræðum. Þegar viðræður hófust spurðu sveitarfélögin ítrekað um réttarstöðu starfsfólks hjúkrunarheimilanna enda umhugað um að staða þess væri tryggð. Endurtekið var leitað eftir leiðbeiningum frá SÍ um hvernig halda átti á málum starfsfólks. Engin skýr svör og ýmist látið í það skína að lögin ættu við eða ekki. Engin svör bárust um það hvort skýr vilji væri af hálfu ráðuneytisins um að beita umræddum lögum. Alltaf var gengið út frá því að fólkið héldi störfum sínum.

Sveitarfélögin leita til velferðarnefndar Alþingis     
Það leið og beið án þess að niðurstaða málsins lægi fyrir. Það var ekki fyrr en á fundi með heilbrigðisráðuneytinu þann 3. mars sl., mörgum mánuðum eftir að samningum var sagt upp, að sveitarfélögunum var tilkynnt um þá ákvörðun ráðuneytisins að heilbrigðisstofnanir viðkomandi svæða tækju að sér rekstur hjúkrunarheimilanna frá og með 1. apríl 2021. Einnig var það tilkynnt að lög um aðilaskipti, nr. 72/2002 myndu ekki vera látin gilda þannig að störf á heimilunum yrðu auglýst. Sveitarfélögunum yrði þannig nauðugur sá eini kostur að segja öllu starfsfólki heimilanna upp með tilheyrandi óvissu fyrir starfsfólk og heimilismenn. Var þessum vinnubrögðum að sjálfsögðu harðlega mótmælt, enda engan veginn ásættanleg og koma fram rök sveitarfélaganna í bréfum þeirra til ráðuneytisins sem opin eru undir fundargerðum á heimasíðum þeirra

Það hefði verið ólíkt ábyrgari og faglegri viðbrögð ráðuneytisins við uppsögn sveitarfélaganna að vinna í samstarfi að farsællri yfirfærslu þessarar viðkvæmu starfsemi. Þannig hefði verið hægt að koma í veg fyrir að mál væri komin í þennan hnút. Ábyrgð á því ber heilbrigðisráðuneytið eitt. Sveitarfélögin hafa því ákveðið að leita til velferðarnefndar Alþingis um að nefndin beiti sér fyrir því að nauðsynlegar ráðstafanir verði gerðar til að tryggja starfsfólki áframhaldandi störf og réttindi við yfirfærsluna.

Jón Björn Hákonarson, bæjarstjóri Fjarðabyggðar
Íris Róbertsdóttir, bæjarstjóri Vestmannaeyja

Nýjustu fréttir

Íþróttir
Valur kemur til Eyja eftir viðburðaríka viku
Goslok
Goslok: dagskrá laugardags
Úr blaði Eyjafrétta
Hvað vita börnin um eldgosið á Heimaey: Kristian Örn
Myndband
Blíðskaparveður og líf um allan bæ á Goslokahátíð
Fréttir
Vinnslustöðin, Huginn og VÍS sýknuð í vatnslagnarmálinu – uppfært
Áhugavert
Fjölbreytt dagskrá fyrir alla fjölskylduna
Stjórnmál
Eyjalistinn gagnrýnir að hafa ekki verið boðaður til fundar með forsætisráðherra
Fréttatilkynning
Vinnupása skilaði vinning
Mest lesið

Góð ráð fyrir siglingu

Sjóveiki

Hvað er sjóveiki?

Sjóveiki er misræmi milli skynfæra líkamans sem senda boð til heilans um hreyfingu – kyrrstöðu.

Þegar einstaklingur er úti á sjó þá nema skynjarar í vökvafylltum gangi í innra eyra hreyfingu og senda boð til heilans að einstaklingur sé á hreyfingu. Augun senda hins vegar boð til heilans um að viðkomandi sé kyrr. Heilinn á erfitt með að vinna úr þessum misvísandi og ósamræmdu upplýsingum og sendir skilaboð til magans um að tæma sig – þ.e. veldur uppköstum.

Einkenni sjóveiki eru þreyta, ógleði, svimi, svitakóf og uppköst.

Góð ráð til að hindra sjóveiki:

  • Góð hvíld daginn fyrir brottför. Að fara seint að sofa og snemma um borð í bát fer ekki vel saman ef fólk er hætt við sjóveiki.
  • Forðist áfenga drykki daginn fyrir brottför
  • Forðist djúpsteiktan, brasaðan eða saltan mat daginn fyrir siglingu.
  • Borðið góðan morgunverð. Borðið gjarnan hvítt brauð, hafragraut og ávexti þó ekki sítrus ávexti.
  • Forðist mikið koffein. Mikið kaffi er ekki það sem maganum líkar fyrir sjóferð.
  • Hafðu mat með þér á sjó. Gott er að hafa samlokur með kjúklingi eða kalkún. Kjötið er fitusnautt og brauðið er róandi í maga. Hafðu endilega eitthvað til að grípa í sem er létt í maga. Bananar eru mjög góðir til að narta í ef þú finnur fyrir ógleði en einnig er gott að hafa létt kex eða annað sem er ekki salt eða fitumikið.
  • Drekkið vel af vatni en einnig er gott er að drekka kóla drykki eða engiferöl í sjóferðinni

Lyf við sjóveiki þ.e. lyf sem slá á einkennin og fást án lyfseðils í apóteki.

  • Koffínátín – fæst án lyfseðils
  • Postafen – fæst án lyfseðils
  • Scopolamin plástur – lyfseðilsskyltEinnig má fá armbönd gegn ferðaveiki sem sumir telja að hjálpi.

Önnur ráð:

  • Engifer er jurt sem nýlega hefur fengið aukna athygli vegna þess að því er haldið fram að hún geti slegið á ógleði sem fylgir sjóveiki. Til forna tuggðu kínverskir sjómenn engiferrót til að draga úr sjóveiki. Flest lyf sem virka á ógleði verka á heilann en engifer virkar aðeins á magann. Ráðlagt er að taka 1000 mg. hylki hálftíma fyrir brottför. Einnig má taka eitt eða tvö 500 mg. hylki sem eru til viðbótar á ferðalaginu. Ekki er ráðlagt að drekka coke með engifertöflum.
  • Piparminta og te eru einnig gömul húsráð við ferðaveiki.
  • Sumum finnst betra að taka sýrujafnandi töflur, Alminox eða slíkt áður en þú heldur á sjó og þá er gott að hafa box með út á sjó.

Hvar í skipinu er best að vera o.fl.

  • Minna finnst fyrir hreyfingu og veltingi ef maður er staddur næst miðju bátsins.
  • Mörgum finnst gott að vera í kulda, t.d.að vera úti á dekki og láta vindinn leika um sig.
  • Matarlykt fer illa í þá sem hætt er við sjóveiki og einnig pústið frá bátnum.

Þungun:

Þungaðar konur sem þjást af sjóveiki mega nota koffinátín í litlum skömmtum en best er að ráðfæra sig við lækni eða lyfjafræðing.
Þunguðum konum er ekki ráðlagt að nota engifer þar sem það er ekki staðfest hvort það geti haft skaðleg áhrif á fóstur.

Eyjafréttir
Keyrt af  GDPR Cookie Compliance
Friðhelgisyfirlýsing

Þessi vefsíða notar fótspor til að við getum veitt þér bestu notendaupplifun. Upplýsingar um fótspor eru geymdar í vafranum þínum og framkvæma aðgerðir eins og að þekkja þig þegar þú kemur aftur á vefsíðu okkar og hjálpa teymi okkar að skilja hvaða hluta vefsíðunnar þér finnst áhugaverðast og gagnlegast.