Frekari nafnaskipti á skipum Vinnslustöðvarinnar
Myndir: Sverrir Haraldsson.

Samhliða frétt um nafn á nýju skipi Vinnslustöðvarinnar, Garðari sem verður Gullberg er sagt frá frekari nafnabreytingum á skipum félagsins og saga þeirra rakin: 

Gullberg

„Vinnslustöðin eignaðist 35% hlut í Ufsabergi ehf. á árinu 2008 og tók þá um leið við útgerð skips félagsins, Gullbergs. Síðar sameinuðust félögin undir nafni Vinnslustöðvarinnar.

Ufsaberg var stofnað 1969 og gerði út fjögur skip með sama nafni og númeri, Gullberg VE-292. Guðjón Pálsson, einn eigenda Ufsabergs, var meðal aflasælustu  skipstjóra Vestmannaeyja.

Eyjólfur sonur hans tók við skipstjórn og útgerð Gullbergs þegar faðir hans lést árið 1987. Eyjólfur Guðjónsson er nú skipstjóri á Vinnslustöðvarskipinu Ísleifi VE-63.

Vinnslustöðin seldi síðasta Gullbergið úr landi sumarið 2017.“

Sighvatur Bjarnason

„Vinnslustöðin átti um árabil og gerði út nóta- og togveiðiskipið Sighvat Bjarnason VE-81 sem smíðað var í Noregi 1975. Skipið lá hin síðari ár við bryggju í Vestmannaeyjum og var selt úr landi á dögunum. Það var nefnt eftir Sighvati Bjarnasyni eldri (1903-1975), fyrsta aflakóngi Vestmannaeyja og landsþekktum skipstjóra. Sighvatur hætti til sjós 1959 og gerðist framkvæmdastjóri Vinnslustöðvarinnar. Þegar Stefán Runólfsson tók við sem framkvæmdastjóri 1974 var Sighvatur kjörinn stjórnarformaður Vinnslustöðvarinnar og gegndi formennskunni til dauðadags.“

Fjölskylduþræðirnir eru sterkir enn þann dag í dag. Guðmunda Áslaug Bjarnadóttir Sighvatssonar, fiskverkandi og útgerðarmaður í Vestmannaeyjum, er í stjórn Vinnslustöðvarinnar og hefur verið undanfarin ár. Sonur hennar, Sindri Viðarsson, er sviðsstjóri uppsjávarsviðs Vinnslustöðvarinnar.“

KAP

„Þetta skipsheiti vefst fyrir ýmsum að skilja og ekki að undra. Kap er nefnilega gælunafn stúlkubarns og á rætur að rekja til bandarískrar skáldsögu, The Hidden Hand – Hin hulda hönd – sem birtist fyrst ytra 1859 en kom út í íslenskri þýðingu árið 1905 undir heitinu Kapítóla. Bókin varð geysivinsæl hérlendis sem annars staðar. Jón Jónsson, útgerðarmaður í Vestmannaeyjum, var í fjölmennum hópi fólk sem heillaðist af sögunni um Kapítólu og þau hjón, Jón og Þórunn Snorradóttir, skírðu eina dóttur sína Þuríði Kapítólu. Sú var víst allaf kölluð Kap og þá förum við að verða sjóðheit í leit að útskýringu á þessu skipsheiti Vinnslustöðvarinnar.

Kapítólu í skáldsögunni er þannig lýst að hún hafi verið hugdjörf, kraftmikil og uppreisnargjörn og helst ekki viljað hlýða nokkrum manni. Hún lenti í lífsháska oftar en einu sinni og oftar en tvisvar en bjargaði sér með djörfung og hugdirfsku.

Kapítóla læddist ekki með veggjum eins og mörgum fannst að konur ættu jafnan að gera, aðallalega auðvitað karlpeningi. Jónas Jónsson frá Hriflu skrifaði hneykslunargreinar í blöð um Kapítólu og sama gerði Bjarni frá Vogi.

Halldór Laxness tók hins vegar upp hanskann fyrir uppreisnarstelpuna og íslenskan útgefanda bókarinnar, Jóhann Jóhannesson. Í æviminningum sínum, Í túninu heima – útgefnum 1975, lýsti Nóbelsskáldið því yfir að Kapítóla væri „ágæt bók“ en hvaða dóna sem er hefði haldist uppi að kasta rýrð á Jóhann útgefanda sögunnar,“ segir í þessari bráðskemmtilegu samantekt.

Á myndinni er Kap VE við bryggju.

 

Nýjustu fréttir

Íþróttir
„Nú þurfum við á ykkur að halda“
Íþróttir
Tap hjá ÍBV gegn Stjörnunni
Mannlíf
Hoppukastalar, pylsur og Arsenal-stemning í Höllinni
Úr blaði Eyjafrétta
Hjónin Rósa og Ágúst deila áhuga á handverki
Íþróttir
Eyjakonur sækja Stjörnuna heim í mikilvægum leik
Áhugavert
45 nemendur útskrifuðust frá FÍV
Fréttatilkynning
Eldri hjón deila 336 milljónum með börnum og barnabörnum
Þjóðhátíð
Hipsumhaps á Þjóðhátíð
Mest lesið

Góð ráð fyrir siglingu

Sjóveiki

Hvað er sjóveiki?

Sjóveiki er misræmi milli skynfæra líkamans sem senda boð til heilans um hreyfingu – kyrrstöðu.

Þegar einstaklingur er úti á sjó þá nema skynjarar í vökvafylltum gangi í innra eyra hreyfingu og senda boð til heilans að einstaklingur sé á hreyfingu. Augun senda hins vegar boð til heilans um að viðkomandi sé kyrr. Heilinn á erfitt með að vinna úr þessum misvísandi og ósamræmdu upplýsingum og sendir skilaboð til magans um að tæma sig – þ.e. veldur uppköstum.

Einkenni sjóveiki eru þreyta, ógleði, svimi, svitakóf og uppköst.

Góð ráð til að hindra sjóveiki:

  • Góð hvíld daginn fyrir brottför. Að fara seint að sofa og snemma um borð í bát fer ekki vel saman ef fólk er hætt við sjóveiki.
  • Forðist áfenga drykki daginn fyrir brottför
  • Forðist djúpsteiktan, brasaðan eða saltan mat daginn fyrir siglingu.
  • Borðið góðan morgunverð. Borðið gjarnan hvítt brauð, hafragraut og ávexti þó ekki sítrus ávexti.
  • Forðist mikið koffein. Mikið kaffi er ekki það sem maganum líkar fyrir sjóferð.
  • Hafðu mat með þér á sjó. Gott er að hafa samlokur með kjúklingi eða kalkún. Kjötið er fitusnautt og brauðið er róandi í maga. Hafðu endilega eitthvað til að grípa í sem er létt í maga. Bananar eru mjög góðir til að narta í ef þú finnur fyrir ógleði en einnig er gott að hafa létt kex eða annað sem er ekki salt eða fitumikið.
  • Drekkið vel af vatni en einnig er gott er að drekka kóla drykki eða engiferöl í sjóferðinni

Lyf við sjóveiki þ.e. lyf sem slá á einkennin og fást án lyfseðils í apóteki.

  • Koffínátín – fæst án lyfseðils
  • Postafen – fæst án lyfseðils
  • Scopolamin plástur – lyfseðilsskyltEinnig má fá armbönd gegn ferðaveiki sem sumir telja að hjálpi.

Önnur ráð:

  • Engifer er jurt sem nýlega hefur fengið aukna athygli vegna þess að því er haldið fram að hún geti slegið á ógleði sem fylgir sjóveiki. Til forna tuggðu kínverskir sjómenn engiferrót til að draga úr sjóveiki. Flest lyf sem virka á ógleði verka á heilann en engifer virkar aðeins á magann. Ráðlagt er að taka 1000 mg. hylki hálftíma fyrir brottför. Einnig má taka eitt eða tvö 500 mg. hylki sem eru til viðbótar á ferðalaginu. Ekki er ráðlagt að drekka coke með engifertöflum.
  • Piparminta og te eru einnig gömul húsráð við ferðaveiki.
  • Sumum finnst betra að taka sýrujafnandi töflur, Alminox eða slíkt áður en þú heldur á sjó og þá er gott að hafa box með út á sjó.

Hvar í skipinu er best að vera o.fl.

  • Minna finnst fyrir hreyfingu og veltingi ef maður er staddur næst miðju bátsins.
  • Mörgum finnst gott að vera í kulda, t.d.að vera úti á dekki og láta vindinn leika um sig.
  • Matarlykt fer illa í þá sem hætt er við sjóveiki og einnig pústið frá bátnum.

Þungun:

Þungaðar konur sem þjást af sjóveiki mega nota koffinátín í litlum skömmtum en best er að ráðfæra sig við lækni eða lyfjafræðing.
Þunguðum konum er ekki ráðlagt að nota engifer þar sem það er ekki staðfest hvort það geti haft skaðleg áhrif á fóstur.

Eyjafréttir
Keyrt af  GDPR Cookie Compliance
Friðhelgisyfirlýsing

Þessi vefsíða notar fótspor til að við getum veitt þér bestu notendaupplifun. Upplýsingar um fótspor eru geymdar í vafranum þínum og framkvæma aðgerðir eins og að þekkja þig þegar þú kemur aftur á vefsíðu okkar og hjálpa teymi okkar að skilja hvaða hluta vefsíðunnar þér finnst áhugaverðast og gagnlegast.