Fjölskylda Gunnars Karls Haraldssonar hefur stofnað minningarsjóð í hans nafni.
Gunnar var fæddur árið 1994 og ólst upp í Vestmannaeyjum. Hann greindist mjög ungur með taugasjúkdóminn Neurofibromatosis (NF1) sem hafði mikil áhrif á hans líf og lífsgæði. Hann lést 28. febrúar 2021 eftir baráttu við krabbamein.
Markmið sjóðsins er að halda baráttumáli hans á lofti með því að styrkja einstaklinga með fötlun til náms, tómstunda og íþróttaiðkunar og málefni sem styðja við þátttöku fatlaðra jafnt við aðra í samfélaginu.
Í tilkynningu á Facebook síðu sjóðsins segir.
Elsku Gunnar Karl okkar hefði orðið 28 ára þann 25. september næstkomandi og að því tilefni munum við formlega fagna stofnun sjóðsins í Eyjum helgina 24.-25. september og vonandi geta sem flest fagnað með okkur. Frekari upplýsingar um viðburðinn verða birtar á næstu dögum.
Það er því mjög viðeigandi að hópur á vegum “römpum upp Ísland” sé að störfum í Eyjum þessa dagana, en stefnt er að því að setja upp níu rampa víðsvegar í bænum á næstunni.
Áhugasömum er bent á heimasíðu minningarsjóðsins hér.
