Nú stendur pysjutíminn sem hæst og margir að hjálpa pysjum aftur út á sjó. Í tilkynningu á Facebook-síðu Sea Life Trust segir að það hafi verið mikið um það að þangað hafi verið komið með slasaðar og illa hirtar pysjur vegna rangrar meðferðar.

Starfsmenn Sea Life vilja því árétta nokkrar grunnreglur sem nauðsynlegt er að hafa í huga þegar pysjur eru annars vegar:

1. Alls ekki sleppa pysjunum í höfnina eða við Skansinn. Þær verða olíublautar og drukkna við það.
2. Alls ekki sleppa pysjum á móti strangri vindátt, þær fjúka aftur í bæinn og höfum við verið að fá mikið slasaðar og lamaðar pysjur eftir að hafa fokið.
3. Ekki setja pysjurnar í bað eða leika ykkur með þær, við það eykurðu stessið hjá og þá er hætta á að þær missi vatnsheldnina.
4. Hafðu pysjuna í kassa með grasi í botninum og geymdu hana á rólegum stað.
5. Vertu alltaf í hönskum þegar þú nærð pysjunni svo olían af höndunum þínum smitist ekki yfir á fjaðrir pysjunnar.
6. Ekki láta lítil börn undir 5 ára sleppa pysjunum. Það er voða krúttlegt að sjá þau sleppa þeim en það er ekki gott fyrir pysjuna.
7. Ef pysjan er með sár eða þú ert ekki 100% viss um að það megi sleppa henni skaltu koma með hana á Beluga Sanctuary í eftirlit.
Mundu að lundapysjur eru ekki leikföng!!