Bæjarráð Vestmannaeyja hefur samþykkt samhljóða að setja 2. og 3. hæð fasteignarinnar að Ægisgötu 2 í söluferli. Á fundi ráðsins fór Brynjar Ólafsson, sviðsstjóri umhverfis- og framkvæmdasviðs yfir verðmat sem unnið var fyrir eignina. Húsnæðisnefnd sveitarfélagsins hafði áður lagt til að þessir hlutar fasteignarinnar yrðu seldir.

Fram kemur í fundargerð að skila þurfi inn tilboðum eigi síðar en 20. mars. Afstaða til tilboðanna verður tekin á fundi bæjarráðs þann 25. mars. Sviðsstjóra umhverfis- og framkvæmdasviðs hefur verið falið að hafa umsjón með framgangi málsins.