Herjólfur verður frá áætlun næstkomandi mánudag og þriðjudag vegna bilunar í rafmótor. Unnið er að viðgerð og hefur verið gripið til bráðabirgðaráðstafana til að tryggja samgöngur milli lands og Eyja.

Í tilkynningu frá Herjólfi ohf. segir: Að undangenginni skoðun sérfræðings á rafmótor skipsins liggi fyrir að senda þurfi mótorinn erlendis til viðgerðar. Af þeim sökum fellur niður áætlunarsigling Herjólfs milli lands og Eyja næstkomandi mánudag og þriðjudag.

Breiðafjarðarferjan Baldur mun leysa af á meðan og sigla samkvæmt gildandi áætlun Herjólfs umrædda daga. Jafnframt mun Baldur sinna gámaflutningum að næturlagi.

Gert er ráð fyrir að Herjólfur verði aftur kominn í áætlun næstkomandi miðvikudag og mun hann sigla til Landeyjahafnar um leið og aðstæður leyfa.