Ísfisktogarinn Bergey VE landaði fullfermi í heimahöfn í Vestmannaeyjum mánudaginn 22. júní og aftur í gær. Rætt er stuttlega við Jón Valgeirsson skipstjóra á vefsíðu Síldarvinnslunnar og er hann spurður um veiðarnar.

„Við lönduðum fullfermi mánudaginn 22. júní en héldum síðan ekki til veiða á ný fyrr en á fimmtudag. Síðan lönduðum við fullfermi á ný í gær. Í fyrri túrnum var veitt á Víkinni og Pétursey og reyndar einnig á Ingólfshöfða. Aflinn var blandaður. Í seinni túrnum vorum við allan tímann á Ingólfshöfðanum og áfram var aflinn blandaður; þorskur, ýsa. ufsi og koli. Þarna var í reyndinni ágæt veiði og fiskurinn sem fékkst var hinn fallegasti. Við munum halda til veiða á ný á fimmtudag,” sagði Jón.