Óheppnin heldur áfram að elta Herjólf en bókunarkerfi félagsins hefur legið niðri stóran hluta dagsins vegna eldsvoða í gagnaveri í Amsterdam þar sem kerfið er hýst.

Frá þessu er greint í tilkynningu á samfélagsmiðlum Herjólfs þar sem fram kemur að kviknað hafi í gagnaverinu í morgun og að öll fjarskipti við svæðið liggi niðri.

„Ástæðan er sú að eigandi bókunarvélar okkar hýsir kerfið sitt í gagnaveri í Amsterdam sem kviknaði í í morgun,“ segir í tilkynningunni.

Unnið er að því að slökkva eldinn og verður hafist handa við að koma kerfinu aftur í gang um leið og samband næst við höfuðstöðvar þjónustunnar.

Herjólfur biður farþega um þolinmæði og skilning á meðan unnið er að lausn málsins. Þrátt fyrir vandræðin stefnir Herjólfur áfram á siglingar til Landeyjahafnar á næstu dögum.

„Við komum til með að gefa frá okkur tilkynningu vegna siglinga um leið og starfsmenn okkar komast inn í bókunarkerfið,“ segir í tilkynningunni.