Samkvæmt heimildum Eyjafrétta er búið að ákveða að fjölga ferðum Herjólfs í fjórar ferðir alla daga vikunnar yfir vetrartímann. Samkvæmt vetraráætlun skipsins voru aðeins þrjár ferðir, fimm daga vikunnar en fjórar ferðir á föstudögum og sunnudögum. Vestmannaeyjabær og Eimskip buðust til að greiða fyrir fjórðu ferðina sameiginlega en ekki hafði fengist samþykki fyrir aukaferðinni. Hins vegar er búið að samþykkja tillögu bæjarins og Eimskips en von er á fréttatilkynningu frá Vestmannaeyjabæ eftir skamma stund.