Bjarni Ólafur tónleikarahaldari er Eyjamaðurinn:

Tónleikarnir Aftur Heim verða haldnir í kvöld, föstudagskvöldið 3. maí í Höllinni. Tónleikarnir eru haldnir til styrktar Grindvíkingum en söfnunin er unnin í samráði við Grindavíkurbæ. Allir listamenn og aðstandendur gefa vinnu sína og því rennur miðaverð óskipt í söfnunina.

Það er einvala lið tónlistarmanna sem kemur fram, má þar nefna Júníus Meyvant, Molda, Mucky Muck, Karlakór Vestmannaeyja ásamt meðlimum úr Kvennakór Vestmannaeyja, Blítt og létt hópinn, hljómsveitin Gosar ásamt Unu Þorvalds, Kristínu Halldórs, Tóta Ólafs, Hafþóri Hafsteins, Elísabetu Guðna og Guðnýju Emilíönu.  Matti Matt og Védís Hervör verða sérstakir gestir, það má því búast við miklu fjöri í Höllinni.

Sérstök söfnunarnefnd var skipuð hér í Eyjum og er Bjarni Ólafur Guðmundsson einn af meðlimum hennar, ásamt því að skipuleggja tónleikana. Hann er því Eyjamaður vikunnar.

Fullt nafn: Bjarni Ólafur Guðmundsson.

Fjölskylda: Giftur elsku Guðrúnu Mary minni og við eigum Emmu, Melkorku Mary og Hákon Tristan, tengdasynina Kalla og Helga Pétur og svo litlu gullin okkar, Emilíu Dís og Emil Gauta.

Hefur þú búið annarsstaðar en í Eyjum: Já, nokkrum sinnum á Íslandi, meðal annars í Árbænum, Mosó, Grafarvogi, Vesturbænum og á Nesinu.

Mottó: Faðmaðu heiminn.

Síðasta hámhorfið: The night agent á Netflix.

Uppáhalds hlaðvarp: Hlusta ekki nóg, en dett reglulega í Snorra Björns.

Uppáhalds kvikmynd: The Shawshank redemption.

Aðaláhugamál: Fyrir utan fjölskyldu og vini, klárlega golfið og tónlistin.

Hver er þinn helsti kostur: Ég er frekar bjartsýnn, sem getur líka stundum verið ókostur.

Eitthvað sem þú gerir á hverjum degi sem þú gætir ekki verið án: Tala við konuna mína.

Hvað óttast þú mest: Ekkert sérstakt, ótti er ekki endilega kjörinn meðreiðarsveinn.

Hvaða tónlist kemur þér í gott skap: fyrir utan Eyjalögin öll, er ég svakalega skotinn í countrytónlist og er með “hot country hits” á nánast alla daga.

Hvaða ráð myndir þú gefa 18 ára þér sem veganesti inn í lífið:  Kláraðu að mennta þig drengur og leggðu hluta launanna fyrir.

Hvað er velgengni fyrir þér: Leggðu hjarta og hug í verkefnin, hversu smá sem þau eru, hlustaðu og lærðu af öðrum (uss ég er enn að reyna að læra þetta) Hin eiginlega velgengni er samt hamingjan.

Hvar sérðu sjálfan þig eftir 20 ár: Sem sprækan peyja á besta aldri, spilandi golf með Guðrúnu minni og í eins mikilli nálægð við fjölskyldu og vini og nokkur kostur er.

Fallegasti staður sem þú hefur komið á: Heimaey.

Hvernig kviknaði hugmyndin af tónleikunum: Við Halla Svavars hittumst í Metabolic og hún nefndi við mig hvort við ættum ekki að gera eitthvað fyrir Grindvíkinga.  Hugmyndin var komin í kollinn nokkrum mínútum síðar og við fengum gott fólk með okkur í þetta og Hanna, Hildur, Halla, Gísli Valtýrs og Njáll Ragnars skipa hópinn sem heldur utan um söfnunina og svo eru lykilmenn með tónleikana, Jarl, Gísli Stef, Sæþór og fleiri snillingar.

Við hverju mega tónleikagestir búast við: Fyrst og fremst einstakri Eyjastemningu, þar sem margt af okkar fólki flytur lögin sem við elskum.

Hvernig fer forsalan af stað: Heiðarlega svarið er alls ekki nógu vel – en þekkjandi mitt fólk, þá veit ég að hér eru allir slakir og ég er enn á því að það verði pakkað hús. Okkur rennur blóðið til skyldunnar og ég hef fulla trú á því að einstaklingar og fyrirtæki taki nú við sér og kaupi miða.

Eitthvað að lokum:  Þótt þú komist ekki á tónleikana, hvet ég Eyjafólk nær og fjær til að kaupa miða og styðja þannig við Grindvíkinga og þetta gríðarlega erfiða verkefni sem þau standa í.  Sjóðnum sem þetta rennur inn í er stýrt af Grindavíkurbæ og fer til yngstu hópanna og þeirra elstu, ekki til einstklinga.  Sérstök nefnd er yfir sjóðnum sem mun útdeila styrkjunum.