Útflutningsverðmæti sjávarafurða nam 28,5 milljörðum króna í júlí samkvæmt fyrstu bráðabirgðatölum um vöruviðskipti sem Hagstofan birti á dögunum. Það er nokkuð myndarleg aukning frá júlí í fyrra, eða sem nemur um 26% í krónum talið. Þar sem gengi krónunnar var um 2% veikara nú í júlí en í sama mánuði í fyrra er aukningin aðeins minni í erlendri mynt, eða um 24%. Frá þessu er greint í Radarnum – fréttabréfi SFS.

Ofangreinda aukningu má rekja til nokkurra vinnsluflokka. Ber fyrst að nefna fiskimjöl og lýsi, sem hvort um sig var óvenju fyrirferðarmikið miðað við júlímánuð. Þannig nam útflutningsverðmæti fiskimjöls um 4,4 milljörðum króna í mánuðinum, sem er um 70% aukning á milli ára á föstu gengi. Útflutningsverðmæti lýsis nam svo rúmlega 3,4 milljörðum króna í júlí, sem er hátt í þreföldun á milli ára. Eins var dágóð aukning í útflutningsverðmæti frystra flaka (33%) og ferskra afurða (14%). Á móti vóg talsverður samdráttur í útflutningsverðmæti á heilfrystum fiski, eða sem nemur um 32%. Minni breyting var í útflutningsverðmæti annarra vinnsluflokka, eins og sést á myndinni hér fyrir neðan.

Viðsnúningur í júlí

Á fyrstu sjö mánuðum ársins hafa verið fluttar út sjávarafurðir fyrir rúma 199 milljarða króna. Það er tæplega 1% aukning miðað við sama tímabil í fyrra á föstu gengi. Þó ekki sé um ýkja mikla breytingu að ræða, þá er ljóst að þessi myndarlega aukning í júlí hefur snúið stöðunni við, enda hafði mælst tæplega 3% samdráttur í útflutningsverðmæti sjávarafurða þegar horft var til fyrstu sex mánuði ársins samanborið við fyrstu sex mánuði síðasta árs.

Eins og alla jafna er þróunin mismunandi á milli einstaka vinnsluflokka. Mest hefur aukningin orðið í útflutningsverðmæti lýsis, en verðmæti þess er komið í 17 milljarða króna á fyrstu sjö mánuðum ársins, samanborið við 12 milljarða á sama tímabili í fyrra. Það jafngildir rúmlega 42% aukningu á milli ára á föstu gengi. Eins er nokkuð myndarleg aukning í útflutningsverðmæti ferskra afurða. Útflutningsverðmæti þeirra er komið í 54 milljarða króna, sem er um 10% aukning á milli ára á föstu gengi. Þá jókst útflutningsverðmæti frystra flaka um 6% á sama kvarða og saltaðra og þurrkaðra afurða um 2%.

Samdráttur er í útflutningsverðmæti annarra vinnsluflokka. Vegur þar þyngst 30% samdráttur í heilfrystum fiski og 19% samdráttur í fiskimjöli. Það má hvort tveggja má, að stærstum hluta, rekja til loðnubrests. Af öðrum afurðaflokkum má nefna að um 16% samdráttur í útflutningsverðmæti rækju og 1% samdráttur í flokknum „aðrar sjávarafurðir“.