Stefnt er að því að halda tónleika með SSSÓL í Höllinni föstudaginn 5. júní í tilefni sjómannadagshelgarinnar. Miðasalan hefur hins vegar farið hægt af stað og sendi Höllin nýverið frá sér tilkynningu þar sem fólk er hvatt til að tryggja sér miða í forsölu ætli það sér að mæta á tónleikana.

Samkvæmt tilkynningunni hefur forsalan verið undir væntingum og verður endanleg ákvörðun um framhaldið tekin eftir helgi, þó ekkert bendi til annars en að stefnt sé að því að halda tónleikana.

Undirbúningur fyrir viðburðinn hefur staðið yfir um nokkurt skeið og hefur bæði verið fjárfest í nýju hljóðkerfi og ljósabúnaði til að gera tónleikaupplifunina sem glæsilegasta.

„Við höfum orðið vör við mikinn áhuga á tónleikunum þótt ekki séu margir búnir að tryggja sér miða ennþá,“ segir í tilkynningu frá Höllinni.

Því eru allir sem hyggjast mæta hvattir til að kaupa miða á næstu dögum. Ef tónleikarnir yrðu af einhverjum ástæðum ekki haldnir yrðu miðar endurgreiddir að fullu.

Einnig er boðið upp á hópapantanir fyrir þá sem vilja mæta saman á tónleikana.