Rafmagn fór af Vestmannaeyjabæ skömmu fyrir kl. 09 í morgun. Samkvæmt upplýsingum frá Landsneti og HS veitum er um að ræða bilun í línukerfi Landsnets uppi á landi. Á fundi sem nefndin átti með fulltrúum Landsnets og almannavarnadeild ríkislögreglustjóra nú fyrir stundu kom fram að unnið er að því að koma rafmagni á aftur en gera má ráð fyrir að viðgerð geti tekið a.m.k. tvær til þrjár klukkustundir.

HS veitur keyra nú allt það varaafl sem er til staðar hér í Eyjum þ.m.t. færanlega rafstöð Landsnets sem kom hingað til Eyja fyrir tveimur vikum. Varaaflið er hins vegar enn ekki nægjanlega mikið til að hægt sé að anna aflþörf að fullu. Af þeim sökum þarf að skerða skóladag nemenda í leik- og grunnskóla og munu skólarnir senda forráðamönnum nánari upplýsingar hvað það varðar.

Nánari upplýsingar um stöðuna og framgang viðgerða má sjá á heimasíðu Landsnets og heimasíðu HS veitna.