Karlalið ÍBV í handbolta leikur sinn fyrsta heimaleik á tímabilinu í dag þegar Selfoss kemur í heimsókn. Flautað verður til leiks í Íþróttamiðstöð Vestmannaeyja klukkan 18:00.

Bæði lið leita að sínum fyrstu stigum í Olísdeildinni. ÍBV tapaði 38:29 fyrir Haukum á útivelli í fyrstu umferðinni og situr í 11. sæti deildarinnar. Selfoss er í áttunda sæti eftir 34:30 tap gegn Val á heimavelli.

Þrír leikir fara fram í annarri umferð deildarinnar í dag. Auk viðureignar ÍBV og Selfoss mætast Þór og HK á Akureyri klukkan 19:00 og Afturelding tekur á móti FH klukkan 20:15.

Það má búast við hörkuleik í Íþróttamiðstöðinni í kvöld þar sem Eyjamenn freista þess að komast á sigurbraut fyrir framan heimamenn.