ÍBV hefur fengið til liðs við sig tvo leikmenn úr USA Team Handball, þá Gary Phillips og Parkman Cook. Þeir munu æfa og leika með ÍBV og HBH á komandi tímabili. Handknattleiksdeild ÍBV greindi frá þessu á samfélagsmiðlum sínum.

Í tilkynningu handknattleiksdeildar segir að ÍBV hafi hafið samstarf við USA Team Handball, sem er þróunarverkefni sem snýst um að undirbúa bandaríska handboltaleikmenn fyrir Ólympíuleikana sem haldnir verða í Los Angeles í Bandaríkjunum sumarið 2028.

Liðin mættust fyrr í sumar þegar ÍBV var í æfingaferð í Hollandi. Bandaríska liðið var þá á ferðalagi um Evrópu til þess að æfa og spila við lið frá ýmsum löndum. Í kjölfarið hófst samtal þar sem bandaríska liðið hafði heyrt gott af ÍBV og því starfi sem er unnið hjá félaginu.

„Þeir eru í þeim fasa að vera að byggja upp handboltamenn, marga hverja frá grunni, og þeir töldu ÍBV vera góðan stað fyrir sína menn,“ segir í tilkynningunni.

Þar segir einnig: ,,Gary Phillips er kraftmikil örvhent skytta. Gary var eftirsóttur hjá liðum víðs vegar í Evrópu, en forsvarsmenn USA Team Handball töldu ÍBV vera besta staðinn fyrir hann til þess að þróast og taka næsta skref sem handboltamaður.

Parkman Cook, sem er ungur miðjumaður/vinstri skytta, kemur líka til okkar enda töldu menn að Eyjar væru besti staðurinn fyrir hann til framþróunar.”

Handknattleiksdeild ÍBV hlakkar til að taka á móti Gary og Parkman og býður þá velkomna til ÍBV.