Enn og aftur leggst Hafrannsóknarstofnun gegn fyrirhugaðri efnistöku þýska sementsfyrirtækisins Heidelberg af hafsbotni við Landeyjahöfn sem allir umsagnaraðilar, ekki síst bæjarstjórn Vestmannaeyja hafa mótmælt kröftuglega. „Stofnunin gerir þetta þrátt fyrir að Heidelberg hafi minnkað fyrirhugaða efnistöku í kjölfar gagnrýni fyrr á árinu. Þetta kemur fram í nýrri umsögn Hafrannsóknarstofnunar um efnistökuna. Umsögnin var birt fimmtudaginn 26. september. Stofnunin kallar framkvæmdina „stórskala“ og án fordæma hér á landi,“ segir í frétt RÚV um málið.

Í upphaflegri áætlun Heidelberg var gert ráð fyrir að dæla upp 80 milljón rúmmetrum af sandi á 30 árum en hefur lækkað sig í 60 milljónir rúmmetra. Hafró telur enn ríka áherslu til þess að staðið sé vörð um svæðið undan Landeyjahöfn. Bæjarstjórn hefur líka bent á að vatnsleiðslur, rafstrengir og ljósleiðarar til Vestmannaeyja geti verið í hættu. Skýrsla Hafró er öflugt vopn í baráttu Vestmannaeyinga gegn þessum stórtæku áætlunum sem gætu haft mjög alvarlegar og óafturkræfar afleiðingar á lífríki við Suðurströndina.