Nú þegar frumvarp um veiðigjald hefur verið afgreitt úr nefnd með litlum breytingum, virðist vera að þær breytingar sem voru gerðar snúi aðallega að því að lækka gjöld á minni útgerðir auk þess að viðmið í makríl fer úr 100% í 80% af makrílverði í Noregi. Eyjafréttir leituðu viðbragða stjórnarformanns Ísfélagsins, Einars Sigurðssonar vegna þessa.

„Mér sýnist ekkert þarna hafa breyst raunverulega. Frítekjumörk eru hækkuð sem kemur sér vel fyrir minni aðila og strandveiði. Í raun virðist heildar gjaldtakan hækka frá fyrstu útgáfu frumvarpsins eftir að réttari tölur komu fram. Eftir sem áður stendur það að miða við 80% í makríl í stað 100% er bara út í loftið þegar atvinnuveganefnd var komin með gögn og skýrslur sem sýndu verðmuninn á íslenskum makríl og norskum. Staðreyndin er sú íslenskum makríl sem landað er í Noregi, hefur verið seldur á u.þ.b. helming af verði þess norska. Þetta liggur fyrir en eins og áður er ekkert tekið tillit til gagna,” segir hann.

Suðurkjördæmi og Norðaustur sitja eftir

Varðandi gjaldtökuna segir Einar að hún komi öll í einu og virðist vera jafn hjá ef ekki hærri á milli fyrstu útreikninga frumvarpsins fyrir atvinnulífið í Vestmannaeyjum.

„Það gefur augaleið að slík hækkun mun að sjálfsögðu hafa mikil áhrif. Ég var auðvitað að vonast til þess að hægt væri að treysta því að vinnubrögð yrðu bætt og þetta yrði gert á lengri tíma. Þannig höfðu einstaka stjórnmálamenn talað. Varðandi gögn málsins er mjög sérstakt að um að leið og skatturinn hafði reiknað ákveður nefndin að slíta fundum og setja málið í aðra umræðu. Fulltrúar skattsins voru ekki kallaðir fyrir nefndina og enn og aftur er ekki hægt að fá gögnin sem liggja til grundvallar afhent. Hvernig geta þingmenn eða aðrir tekið afstöðu um málið þegar þeir fá ekki nauðsynlegar upplýsingar.”

Einar svarar því þannig hvort tekið hafi verið tekið tillit til þeirra sjónarmiða sem komu frá hagsmunaaðilum eða komu fram á opnum fundi Eyjafrétta um veiðigjaldið, „nei varla, staðan var löguð aðeins í Norðvesturkjördæmi en Suðurkjördæmi og Norðaustur sitja eftir.