Íris Róbertsdóttir, bæjarstjóri Vestmannaeyja, gagnrýnir frestun á fundi þingmanna Suðurkjördæmis með bæjarstjórn vegna samgangna. Í færslu á Facebook bendir hún á að Eyjamenn þurfi sjálfir að gera ráð fyrir lengri siglingaleiðinni til Þorlákshafnar þegar ekki sé fært í Landeyjahöfn.

„Annað árið í röð þarf að fresta fundi þingmanna Suðurkjördæmis með bæjarstjórn Vestmannaeyja vegna ölduhæðar í Landeyjahöfn,“ skrifar Íris.

Hún segir þessar aðstæður vera hluta af daglegum samgöngum íbúa og beinir skýrri ábendingu til þingmanna fyrir næstu kjördæmaviku: „Skipuleggið ferðina út frá „löngu leiðinni“ frá upphafi. Það er veruleikinn sem Eyjamenn búa við alla daga.“

Karl Gauti fór til Eyja

Karl Gauti Hjaltason, þingmaður Miðflokksins greinir einnig frá frestuninni í færslu á Facebook. Þar segir hann að þingmenn hafi á fyrsta degi kjördæmaviku, á mánudag, fundað með sveitarstjórnarfulltrúum á Hornafirði, í Skaftárhreppi og Mýrdalshreppi. Hann hafi síðan haldið til Eyja seint um kvöldið.

„Þar sem veður- og ölduspá er fremur óhagstæð var fundi okkar þingmanna með bæjarstjórn í Eyjum frestað fram í október,“ skrifar Karl Gauti. Sjálfur kveðst hann nýta daginn í Eyjum til að hitta mann og annan.