Klara Einars sendi frá sér nýtt lag í síðustu viku “Ef þú þorir” og í morgun var það tilkynnt á hún verður á stóra sviðinu á Þjóðhátíð í Vestmanneyjum. Á síðustu rúmlega tveimur árum hefur hún sent frá sér átta lög bæði ein og í samvinnu við aðra og í sumar verður hún á fleygiferð um landið og kemur fram á Þjóðhátíð, Kótelettunni á Selfossi, Reykhóladögum, Novafest og Húkkaraballinu um Verslunarmannahelgina og ennþá er að bætast við dagskránna hennar, segir í tilkynningu.

Árið 2025 hófst með krafti hjá Klöru þegar hún var tilnefnd sem Nýliði ársins á Hlustendaverðlaununum – viðurkenning sem hún lýsir sem óvæntu og ógleymanlegu augnabliki. Í kjölfarið gaf hún út tvo dúetta: VBMM? með Katrínu Myrru í febrúar og Bara ef þú vissir með Ágústi Brynjari í mars, sem báðir fengu mikla spilun á útvarpsstöðvum og streymisveitum. „Síðasta ár var algjör rússíbani, mikil gleði og auðvitað mikil vinna,“ segir Klara. „Ég hlakka mikið til að spila í sumar – og það er fullt af nýju efni á leiðinni.“

Nýjasta lag Klöru Einarsdóttur, Ef þú þorir, kom út síðasta föstudag. Lagið varð til með óvæntum hætti í stúdíóinu þegar hún var að vinna “Bara ef þú vissir” með Ágústi Brynjari og Hákoni Guðna. „Við kláruðum lagið svo snemma að það var tími afgangs – Hákon spilaði fyrir mig beat og ég hoppaði strax á micinn,“ segir Klara. Lagið varð nánast til í einni setu og fjallar um þá spennu sem skapast þegar maður er hrifinn – en bíður eftir að hinn aðilinn þori að taka fyrsta skrefið. „Mér finnst bestu lögin verða til svona – þegar maður er ekki að reyna of mikið.“