Það má með sanni segja að fjárfestar hafi trú á því sem er að gerast í Vestmannaeyjum.
Ekki er langt síðan að kauphallarfyrirtækið Kaldalón hf. og stórir innlendir fjárfestar líkt og aðilar tengdir Eskju og Jón Ásgeiri keyptu eignir á vel yfir 1000 milljónir í Eyjum. Má þar nefna eignir eins og Hótel Vestmannaeyjar, Gamla pósthúsið, Bása, ný einbýlishús o.s.frv.
Stórir aðilar hafa sömuleiðis fjárfest í Laufeyju. Verkefni við afleggjarann til Landeyjahafnar, sem mun skila auknum ferðamannafjölda til Eyja og hjálpa til við að beina þeim fjölda ferðamanna til Eyja sem keyrir hringveginn á Suðurlandi.
Baðlón og lúxus hótel er samkvæmt heimildum Eyjar.net að fara á fullt sem mun umbylta ferðaþjónustunni í Eyjum og styrkja ferðaþjónustuna svo um munar. Verkefnið hefur verið keyrt áfram af Skugga. Skuggi hefur margsýnt það að hann kann að byggja. Það má finna tengingar milli ofangreindra verkefna og þessa verkefnis.
Ísfélagið hf. lauk nýlega vel heppnuðu hlutafjárútboði, sem sýnir tiltrú fjárfesta. Stuttu áður hafði fyrirtækið byggt upp hrognavinnslu sína, sem er framkvæmd uppá hundruði milljóna. Þá tilkynnti Ísfélagið í gær um kaup á uppsjávarskipi sem kemur til félagsins á næsta ári.
Vinnslustöðin hf. er lögð á stað í mikla uppbyggingu. Gamla þróin var rifinn og er verið að byggja þar upp til framtíðar, vinnubúðir hafa verið reistar til að taka á móti þeim fjölda starfsmanna sem mun vinna við verkefnið. Þá kynnti félagið nýverið methagnað af starfsemi sinni.
Laxey sendi út tilkynningu í byrjun vikunnar þess efnis að lokið sé við sex milljarða hlutafjárútboð fiskeldisins. Það sem helst vekur athygli þar er hversu stórir erlendir aðilar eru meðal þátttakenda í útboðinu. Að fá inn aðila tengda EW Group, þýsku fjölskyldusamsteypunni er sagt risastórt. Svipað stórt og að fá Messi til liðs við sig fyrir þá sem spila í matvælageiranum.
Af öllu ofantöldu má sjá að tiltrú fjárfesta sé mikil á atvinnulífinu í Eyjum og það ofan á allt sem nú þegar er til staðar.
