Óli Már yngsti yfirvélstjóri uppsjávarflotans

 

Stökkið úr vélarrúmi Kap yfir í Gullberg er býsna stórt en afskaplega spennandi. Hér er allt stærra í sniðum og ýmis búnaður sem þarf að kynnast og læra á. Steini, yfirvélstjóri á gömlu Kap, er hins vegar með í túrnum og heldur í höndina á mér. Ég er því í góðum málum og verkefnið leggst afar vel í mig.“

Ólafur Már Harðarson er nýráðinn yfirvélstjóri á Gullbergi VE-292. Hann lagði upp í fyrstu veiðiferðina á skipinu fyrir helgina. Ferðinni er heitið á makrílmiðin. Hann er 32 ára og yngsti yfirvélstjóri uppsjávarflota landsmanna að því best er vitað.

Óli Már tók við af Erni Friðrikssyni sem orðinn er yfirvélstjóri á Hugin VE.

Vélstjórnin síaðist inn í genin í æsku því Óli Mar snerist sem stráklingur oft og mikið í kringum afa sinn og nafna, Ólaf Má Sigmundsson, fyrrum yfirvélstjóra á Gullbergi.

Skrifað var í skýin að Óli Már yngri fetaði í atvinnuspor Óla Más eldri og sagan var meira að segja svo notaleg að koma því til leiðar að Óli sá yngri yrði yfirvélstjóri á uppsjávarskipi sem Vinnslustöðin keypti í sumar og nefndi Gullberg. Útgerðarfélagið Ufsaberg gerði á sínum tíma út alls fjögur skip sem öll hétu Gullberg og báru einkennisstafina VE-292. Vinnslustöðin tók við útgerð fjórða Gullbergsins árið 2008 og síðar sameinuðust félögin tvö, Ufsaberg og Vinnslustöðin, undir merkjum Vinnslustöðvarinnar.

Togarinn Gullberg var seldur úr landi árið 2017 og þá var skráningarnúmerið VE-292 lagt inn hjá sýslumanni. Þar var númerið í geymslu til ársins 2020 þegar trillan Adda fékk það. Saman eiga þeir nafnarnir Öddu. Óli eldri var einn af aðaleigendum Ufsabergs á sínum tíma. Hann gaf í sumar Vinnslustöðinni skráningarnúmerið VE-292 fúslega eftir og brosir nú breitt.

Nýjasta Gullbergið í Eyjaflotanum ber því gamla númerið sitt eins og vera ber og afabarnið hefur fengið titilinn yfirvélstjóri í áhöfninni. Gömul saga verður ný í margföldum skilningi.

Beint úr grunnskóla í vélstjóranám

„Gullberg kom inn til löndunar á miðvikudaginn var, 17. ágúst. Ég fór þá um borð og tók til starfa. Fyrstu sólarhringana notaði ég reyndar líka til að rölta og skríða um allt skipið þvert og endilangt til að kynna mér umhverfið almennilega! Gullberg er mjög flott skip í alla staði, endurnýjað í hólf og gólf og því hefur verið sérlega vel við haldið.“

Óli Már hefur starfað hjá Vinnslustöðinni nánast samfleytt frá því skólakerfið skilaði honum út á vinnumarkaðinn. Hann fór að leysa af á Sighvati Bjarnasyni VE  17 ára gamall en áður hafði hann lokið fyrsta stigi vélstjóranáms. Í vélstjórann fór hann beint úr 10. bekk grunnskóla. Síðan varð sjö ára hlé á vélstjóranáminu.

„Ég hef verið á uppsjávarskipum Vinnslustöðvarinnar meira og minna frá 2009. Leysti oft af á Sighvati Bjarnasyni, annars var ég líka eina loðnuvertíð á gamla  Ísleifi en lengst af á Kap. Ég var líka á togaranum Gullbergi og leysti svo af hér og þar þegar ég var í Vélskólanum.

Ég kláraði vélstjóranámið og hingað er ég kominn! Ég ólst upp hjá afa og ömmu og fékk forsmekkinn af framtíðarstarfinu strax í uppeldinu. Þegar af stað var farið á annað borð varð ekki aftur snúið. Vélstjórnin er rétt hilla fyrir mig í tilverunni.“

Af heimasíðu Vinnslustöðvarinnar – vsv.is – Atli Rúnar Halldórsson.

 

Nýjustu fréttir

Myndband
Álfsnes, kjarnaborun og höfnin
Aðsend grein
Vestmannaeyjar, eyjan okkar
Samgöngur
Dýpkun gengur hægt – betri horfur síðar í vikunni
Stjórnmál
Spurt og svarað: Arndís María frá Eyjalistanum
Fréttir
Eitt tilboð í Gjábakkakant – samið niður eftir opnun
Íþróttir
Frábæru Íslandsmóti í sveitakeppni í Boccia lokið
Aðsent
Átta dagar og engin svör frá ráðherrum
Samgöngur
Dýpkun gekk illa í morgun
Mest lesið

Góð ráð fyrir siglingu

Sjóveiki

Hvað er sjóveiki?

Sjóveiki er misræmi milli skynfæra líkamans sem senda boð til heilans um hreyfingu – kyrrstöðu.

Þegar einstaklingur er úti á sjó þá nema skynjarar í vökvafylltum gangi í innra eyra hreyfingu og senda boð til heilans að einstaklingur sé á hreyfingu. Augun senda hins vegar boð til heilans um að viðkomandi sé kyrr. Heilinn á erfitt með að vinna úr þessum misvísandi og ósamræmdu upplýsingum og sendir skilaboð til magans um að tæma sig – þ.e. veldur uppköstum.

Einkenni sjóveiki eru þreyta, ógleði, svimi, svitakóf og uppköst.

Góð ráð til að hindra sjóveiki:

  • Góð hvíld daginn fyrir brottför. Að fara seint að sofa og snemma um borð í bát fer ekki vel saman ef fólk er hætt við sjóveiki.
  • Forðist áfenga drykki daginn fyrir brottför
  • Forðist djúpsteiktan, brasaðan eða saltan mat daginn fyrir siglingu.
  • Borðið góðan morgunverð. Borðið gjarnan hvítt brauð, hafragraut og ávexti þó ekki sítrus ávexti.
  • Forðist mikið koffein. Mikið kaffi er ekki það sem maganum líkar fyrir sjóferð.
  • Hafðu mat með þér á sjó. Gott er að hafa samlokur með kjúklingi eða kalkún. Kjötið er fitusnautt og brauðið er róandi í maga. Hafðu endilega eitthvað til að grípa í sem er létt í maga. Bananar eru mjög góðir til að narta í ef þú finnur fyrir ógleði en einnig er gott að hafa létt kex eða annað sem er ekki salt eða fitumikið.
  • Drekkið vel af vatni en einnig er gott er að drekka kóla drykki eða engiferöl í sjóferðinni

Lyf við sjóveiki þ.e. lyf sem slá á einkennin og fást án lyfseðils í apóteki.

  • Koffínátín – fæst án lyfseðils
  • Postafen – fæst án lyfseðils
  • Scopolamin plástur – lyfseðilsskyltEinnig má fá armbönd gegn ferðaveiki sem sumir telja að hjálpi.

Önnur ráð:

  • Engifer er jurt sem nýlega hefur fengið aukna athygli vegna þess að því er haldið fram að hún geti slegið á ógleði sem fylgir sjóveiki. Til forna tuggðu kínverskir sjómenn engiferrót til að draga úr sjóveiki. Flest lyf sem virka á ógleði verka á heilann en engifer virkar aðeins á magann. Ráðlagt er að taka 1000 mg. hylki hálftíma fyrir brottför. Einnig má taka eitt eða tvö 500 mg. hylki sem eru til viðbótar á ferðalaginu. Ekki er ráðlagt að drekka coke með engifertöflum.
  • Piparminta og te eru einnig gömul húsráð við ferðaveiki.
  • Sumum finnst betra að taka sýrujafnandi töflur, Alminox eða slíkt áður en þú heldur á sjó og þá er gott að hafa box með út á sjó.

Hvar í skipinu er best að vera o.fl.

  • Minna finnst fyrir hreyfingu og veltingi ef maður er staddur næst miðju bátsins.
  • Mörgum finnst gott að vera í kulda, t.d.að vera úti á dekki og láta vindinn leika um sig.
  • Matarlykt fer illa í þá sem hætt er við sjóveiki og einnig pústið frá bátnum.

Þungun:

Þungaðar konur sem þjást af sjóveiki mega nota koffinátín í litlum skömmtum en best er að ráðfæra sig við lækni eða lyfjafræðing.
Þunguðum konum er ekki ráðlagt að nota engifer þar sem það er ekki staðfest hvort það geti haft skaðleg áhrif á fóstur.

Eyjafréttir
Keyrt af  GDPR Cookie Compliance
Friðhelgisyfirlýsing

Þessi vefsíða notar fótspor til að við getum veitt þér bestu notendaupplifun. Upplýsingar um fótspor eru geymdar í vafranum þínum og framkvæma aðgerðir eins og að þekkja þig þegar þú kemur aftur á vefsíðu okkar og hjálpa teymi okkar að skilja hvaða hluta vefsíðunnar þér finnst áhugaverðast og gagnlegast.