Togarinn Ottó N. Þorláksson frá Vestmannaeyjum varð vélarvana undan Siglufirði í kvöld og var björgunarskipið Sigurvin kallað út á mesta forgang til að koma skipinu til aðstoðar. Þetta kemur fram í tilkynningu frá Slysavarnafélaginu Landsbjörg.

Rétt fyrir klukkan 19 bárust stjórnstöð Landhelgisgæslunnar boð frá áhöfn Ottós um að skipið væri aflvana og hættulega nálægt landi. Samkvæmt tilkynningunni hafði lega ofhitnað og mikill reykur myndast, en enginn eldur kom upp.

Þegar útkallið barst var togarinn kominn í um eina sjómílu frá landi. Átta manna áhöfn hans brást þegar við með því að varpa akkeri og toghlerum til að draga úr reki skipsins. Áhöfn Sigurvins hélt úr höfn um fimmtán mínútum eftir að útkallið barst og var komin að Ottó um klukkan 19:30. Taug var komið á milli skipanna og hófst þá tog inn Siglufjörð.

Þrátt fyrir að Sigurvin sé aðeins um 15 metrar að lengd dró hann hinn rúmlega 50 metra langa og um 800 brúttótonna togara örugglega til hafnar. Þegar tilkynningin var send út voru skipin komin inn á Siglufjörð og verið var að koma Ottó N. Þorlákssyni að bryggju.