Á miðnætti rennur út umsóknarfrestur fyrir lóðir sem Vestmannaeyjabær hefur auglýst við Miðgerði 1–11 og Helgafellsbraut 22–26. Um er að ræða lóðir fyrir einbýlishús, parhús og raðhús, og hvetur bærinn áhugasama til að skila inn umsóknum fyrir miðnætti í kvöld.

Vestmannaeyjabær býður upp á tvær lóðir fyrir parhús og sex lóðir fyrir einbýlishús við Miðgerði. Hámarksbyggingarmagn er 180 fermetrar á íbúð í parhúsi og 280 fermetrar fyrir einbýlishús. Byggingarhæðir eru breytilegar eftir staðsetningu, en heimilt er að byggja tvær hæðir sunnan við Miðgerði og eina hæð, eða eina hæð með kjallara, norðan við götuna.

Við Helgafellsbraut er í boði lóð fyrir raðhús með þremur íbúðareiningum. Gert er ráð fyrir að húsin verði á einni hæð og geti hver íbúð orðið allt að 170 fermetrar.

Þessu tengt: 16,8 milljóna króna kostnaður Minjastofnunar

Verð á lóðum

Lóðaverð er sem hér segir: Helgafellsbraut 22–26: 2.700.000 kr.. Miðgerði 1–3: 2.000.000 kr.. Miðgerði 5–7: 2.000.000 kr. og Miðgerði 2, 4, 6, 8, 9 og 11: 1.600.000 kr..

Aðeins er um byggingarrétt að ræða og eru tengigjöld, gatnagerðargjöld, eftirlitsgjöld og önnur gjöld ekki innifalin. Lóðaverð og 50% gatnagerðargjalda þarf að greiða innan 30 daga frá úthlutun.

Samkvæmt auglýsingu verða lóðir afhentar í núverandi ásigkomulagi og mun frágangur gatna fara fram samhliða uppbyggingu á svæðinu. Umsækjendur eru hvattir til að kynna sér vel skilmála í deiliskipulagi og nýjar vinnureglur um lóðaúthlutun.

Hér má sækja um lóðir.