Síldarvertíðin hafin hjá Vinnslustöðinni
Góð byrjun og fín gæði á fyrstu Íslandssíldinni sem Gullberg VE landaði
Gullberg VE
Við komuna til Eyja í gær. Ljósmynd/Halldór B. Halldórsson

Gullberg VE kom í gær til Eyja með fyrsta síldarfarm vertíðarinnar, alls um 860 tonn af fallegri Íslandssíld í góðum gæðum.

Í samtali við vef Vinnslustöðvarinnar segir Jón Atli Gunnarsson, skipstjóri á Gullbergi VE, að byrjunin hafi verið góð og aflinn fínn miðað við árstíma. „Við fengum um átta hundruð og sextíu tonn í þremur holum,“ segir Jón Atli.

Síldin gengur innarlega

„Við fengum um átta hundruð og sextíu tonn í þremur holum,“ segir Jón Atli. „Þetta er svona hefðbundin vertíðarsíld.“ Hann segir að síldin hafi verið að ganga nokkuð innarlega miðað við undanfarin ár.

„Við vorum þarna á svæði sem menn kalla hefðbundna slóð, og það hefur verið dálítið sérstakt núna. Það virðist vera talsvert af síld þar sem við erum farin að nálgast 12 mílna mörkin. Við erum ekkert að trolla þar inn á við, en það verður bara að koma í ljós á næstu dögum hvernig þetta þróast — hvort síldin ætlar að halda sig þar inni eða færa sig utar.“

Spurður hvenær hann reikni með að fara aftur segir Jón Atli að það ráðist af því hvernig gengur að vinna aflann. „Við byrjum strax í löndun, en það er verið að flapsa (samflök) þetta, þannig að það tekur sinn tíma. Það gæti orðið miðvikudagskvöld eða jafnvel komið fram á fimmtudag áður en við förum aftur.“

Jón Atli segir að byrjunin lofi góðu og að áhöfnin sé bjartsýn á framhaldið. „Þetta er bara góð byrjun. Við fylgjumst núna með því hvernig síldin hagar sér næstu vikurnar — hvort við finnum hana reglulega á þessum hefðbundnu slóðum. Ef svo er, þá verður þetta fín vertíð.“

Góð gæði

Að sögn Benónýs Þórissonar, framleiðslustjóra VSV, hefur síldin sem kom með Gullbergi reynst mjög góð, bæði í stærð og gæðum.

„Þetta er síld í 290–300 gramma meðalstærð og mjög góð í gæðum,“ segir Benóný. „Manni finnst hún jafnvel betri núna en oft áður í þessari Íslandssíld. Þetta lofar góðu fyrir framhaldið.“

Hann segir að mest af síldinni fari í flakaða framleiðslu og að ferlið gangi afar vel. „Þetta fer nánast allt í flakaða framleiðslu. Þegar við flökum svona síld fer afskurðurinn í bræðslu sem er svona 50/50, þannig að þetta gengur mjög vel í gegnum vinnsluna,“ útskýrir hann.

Að sögn Benónýs fer vinnslan hratt fyrir sig. „Við erum að vinna þetta í einum til tveimur sólarhringum, þannig að þetta verður fljótt afgreitt,“ segir hann.

Benóný bætir við að andinn í vinnslunni sé góður og starfsfólk ánægt að vertíðin sé hafin. „Það er alltaf ákveðin spenna og stemning þegar fyrsta síldin kemur í hús. Þetta er góð byrjun og við hlökkum til framhaldsins.“

Hér að neðan má sjá myndband af komu Gullbergsins til Eyja í gær, auk þess sem áhöfn Hugins VE gerir skipið klárt á síldveiðar.

Play Video

Nýjustu fréttir

Áhugavert
MAST, Fiskistofa og Verðlagsstofa skiptaverðs sameinuð
Aðsend grein
Það þarf meira en hús til að reka skóla
Fréttir
Grjótleit komin á fullt á Haugasvæðinu
Úr blaði Eyjafrétta
Vigga og Guðni hafa heimsótt 86 lönd og eru hvergi nærri hætt
Myndband
Sólhlíð, Áshamar og Stakkagerðistún
Áhugavert
Fyrstu kjarnasýnin komin upp á Landeyjasandi
Aðsent
Hélt að verið væri að gera grín í sér
Myndband
Útlaginn gefur út sitt fyrsta lag: „Þetta er bara byrjunin“
Mest lesið

Góð ráð fyrir siglingu

Sjóveiki

Hvað er sjóveiki?

Sjóveiki er misræmi milli skynfæra líkamans sem senda boð til heilans um hreyfingu – kyrrstöðu.

Þegar einstaklingur er úti á sjó þá nema skynjarar í vökvafylltum gangi í innra eyra hreyfingu og senda boð til heilans að einstaklingur sé á hreyfingu. Augun senda hins vegar boð til heilans um að viðkomandi sé kyrr. Heilinn á erfitt með að vinna úr þessum misvísandi og ósamræmdu upplýsingum og sendir skilaboð til magans um að tæma sig – þ.e. veldur uppköstum.

Einkenni sjóveiki eru þreyta, ógleði, svimi, svitakóf og uppköst.

Góð ráð til að hindra sjóveiki:

  • Góð hvíld daginn fyrir brottför. Að fara seint að sofa og snemma um borð í bát fer ekki vel saman ef fólk er hætt við sjóveiki.
  • Forðist áfenga drykki daginn fyrir brottför
  • Forðist djúpsteiktan, brasaðan eða saltan mat daginn fyrir siglingu.
  • Borðið góðan morgunverð. Borðið gjarnan hvítt brauð, hafragraut og ávexti þó ekki sítrus ávexti.
  • Forðist mikið koffein. Mikið kaffi er ekki það sem maganum líkar fyrir sjóferð.
  • Hafðu mat með þér á sjó. Gott er að hafa samlokur með kjúklingi eða kalkún. Kjötið er fitusnautt og brauðið er róandi í maga. Hafðu endilega eitthvað til að grípa í sem er létt í maga. Bananar eru mjög góðir til að narta í ef þú finnur fyrir ógleði en einnig er gott að hafa létt kex eða annað sem er ekki salt eða fitumikið.
  • Drekkið vel af vatni en einnig er gott er að drekka kóla drykki eða engiferöl í sjóferðinni

Lyf við sjóveiki þ.e. lyf sem slá á einkennin og fást án lyfseðils í apóteki.

  • Koffínátín – fæst án lyfseðils
  • Postafen – fæst án lyfseðils
  • Scopolamin plástur – lyfseðilsskyltEinnig má fá armbönd gegn ferðaveiki sem sumir telja að hjálpi.

Önnur ráð:

  • Engifer er jurt sem nýlega hefur fengið aukna athygli vegna þess að því er haldið fram að hún geti slegið á ógleði sem fylgir sjóveiki. Til forna tuggðu kínverskir sjómenn engiferrót til að draga úr sjóveiki. Flest lyf sem virka á ógleði verka á heilann en engifer virkar aðeins á magann. Ráðlagt er að taka 1000 mg. hylki hálftíma fyrir brottför. Einnig má taka eitt eða tvö 500 mg. hylki sem eru til viðbótar á ferðalaginu. Ekki er ráðlagt að drekka coke með engifertöflum.
  • Piparminta og te eru einnig gömul húsráð við ferðaveiki.
  • Sumum finnst betra að taka sýrujafnandi töflur, Alminox eða slíkt áður en þú heldur á sjó og þá er gott að hafa box með út á sjó.

Hvar í skipinu er best að vera o.fl.

  • Minna finnst fyrir hreyfingu og veltingi ef maður er staddur næst miðju bátsins.
  • Mörgum finnst gott að vera í kulda, t.d.að vera úti á dekki og láta vindinn leika um sig.
  • Matarlykt fer illa í þá sem hætt er við sjóveiki og einnig pústið frá bátnum.

Þungun:

Þungaðar konur sem þjást af sjóveiki mega nota koffinátín í litlum skömmtum en best er að ráðfæra sig við lækni eða lyfjafræðing.
Þunguðum konum er ekki ráðlagt að nota engifer þar sem það er ekki staðfest hvort það geti haft skaðleg áhrif á fóstur.

Eyjafréttir
Keyrt af  GDPR Cookie Compliance
Friðhelgisyfirlýsing

Þessi vefsíða notar fótspor til að við getum veitt þér bestu notendaupplifun. Upplýsingar um fótspor eru geymdar í vafranum þínum og framkvæma aðgerðir eins og að þekkja þig þegar þú kemur aftur á vefsíðu okkar og hjálpa teymi okkar að skilja hvaða hluta vefsíðunnar þér finnst áhugaverðast og gagnlegast.