Í sumar skilaði starfshópur sem þáverandi innviðaráðherra, Sigurður Ingi Jóhannsson skipaði í sl. haust – um könnun á fýsileika jarðganga á milli lands og Vestmannaeyja – af sér skýrslunni til núverandi innviðaráðherra, Svandísar Svavarsdóttur.

Starfshópurinn hafði það hlutverk að setja fram sviðsmyndir um mismunandi útfærslur og kosti og galla hverrar fyrir sig. Þá var starfshópnum falið að leggja fram kostnaðarmetna áætlun um þær rannsóknir og greiningar sem framkvæma þarf, svo hægt verði að leggja endanlegt mat á fýsileika jarðganga til Vestmannaeyja.

Ekkert bólar hins vegar á birtingu skýrslunnar. Samkvæmt heimildum Eyjafrétta eru komnar þó nokkuð margar vikur frá því hópurinn skilaði af sér til ráðherra og enn er þess beðið að hún líti dagsins ljós. Ritstjórn Eyjafrétta hefur marg spurt aðstoðarmann ráðherra um skýrsluna og hvort hægt sé að fá hana til birtingar og hefur fyrirspurn þess efnis legið hjá ráðuneytinu síðan 22. ágúst.

Ekki skilur undirritaður hvað það sé í skýrslunni sem ekki þolir dagsljósið, en hugsanlegt er að nýr ráðherra sé ekki jafn áhugasamur um verkefnið og forveri hans. Engu að síður er skýrslan tilbúin og hlýtur það að kalla á birtingu.