Á bæjarstjórnarfundi í gær var tekið til umræðu listaverk Ólafs Elíassonar sem verið er að vinna í tilefni af 50 ára goslokaafmæli.

Bæði Njáll Ragnarsson, formaður bæjarráðs og Íris Róbertsdóttir, bæjarstjóri kölluðu eftir úr ræðustóli að þau söknuðu þess að fjallað væri um opinberlega hvernig verkið kæmi til með að líta út, „… um sköpun listamannsins“ eins og Njáll orðaði það. Kvörtuðu þau undan að aðallega væri verið að tala um kostnaðinn við það. Nefndu þau bæði m.a. fjölmiðlaumfjöllun þar að lútandi og sögðu að það kæmi vonandi umfjöllun á þá leið.

Nú reyndist það ekki auðvelt að fá yfir höfuð nokkur gögn umfram það sem bókað var um hjá nefndum bæjarins, sem voru þá aðallega vegna skipulagsbreytinga sem nauðsynlegt var að auglýsa og bóka um. Mikil leynd hvíldi yfir verkinu þar til nýlega. Enda þurfti að kalla til úrskurðarnefnd um upplýsingamál til að fá fram gögn í málinu.

Nú er hvíslað um það víða um bæinn að það sé enn þá málfrelsi á Íslandi. Það þarf sem betur fer ekki að koma úr ákveðinni átt umfjöllun um stórar nú eða smáar ákvarðanir eða bara hin ýmsu mál. Við hér á Eyjafréttum birtum fjöldann allan af aðsendum greinum í hverjum mánuði. Einnig væri gaman að því að fá fleiri aðsenda pistla frá fólkinu sem kosið var til að stýra bæjarfélaginu okkar. Jafnvel frá fólkinu sem lofaði auknu gagnsæi og frekara íbúalýðræði. Frá fólkinu sem nú kvartar undan að fá ekki frekari fjölmiðlaumfjöllun um málið!