Kvennalið ÍBV í handbolta gerði góða ferð á Akureyri í dag þegar þær unnu stórsigur á KA/Þór í 16. umferð Olís deildar kvenna. Leikurinn var jafn framan af og eftir stundarfjórðung var staðan 8-8. Eyjakonur gáfu í og fimm mínútur fyrir hálfleiksflautið voru þær komnar með sex marka forystu, 11-17. Staðan í hálfleik 11-18.

Eyjakonur héldu sama dampi í síðari hálfleik og voru komnar með 11 marka forystu á upphafs mínútunum. KA/Þór náðu að minnka muninn niður í sjö mörk en Eyjakonur unnu að lokum öruggan tíu marka sigur. Lokatölur 22-32.

Eftir leikinn eru Eyjakonur enn í 2. sæti deildarinnar með 26 stig, tveimur stigum á eftir toppliði Vals. KA/Þór er í 6. sæti með 13 stig.

Sandra Erlingsdóttir var markahæst í leiknum með 8 mörk úr 8 skotum. Amalia Frøland varði 12 skot í marki ÍBV og Ólöf Maren Bjarnadóttir 3.

Mörk ÍBV: Sandra Erlingsdóttir 8 mörk, Alexandra Ósk Viktorsdóttir 5, Ásdís Halla Hjarðar 5, Birna Berg Haraldsdóttir 5, Birna María Unnarsdóttir 3, Ásta Björt Júlíusdóttir 2, Birna Dögg Egilsdóttir 2, Amelía dís Einarsdóttir 1, Kristrún Ósk Hlynsdóttir 1.

Næsti leikur ÍBV er heimaleikur gegn Stjörnunni, laugardaginn 14. febrúar kl. 14:00.