Vestmannaeyingar minnast þess á morgun, 23. janúar þegar fimmtíu ár verða frá því gos hófst á Heimaey. Gosið hófst rétt fyrir klukkan tvö um nóttina og um morguninn höfðu bátar og aðkomubátar sem voru í höfn í Eyjum flutt hátt í 5000 íbúa af um 5300 til lands. Mesta björgun Íslandssögunnar. Áður en gosi lauk þann þriðja júlí sama ár hafði þriðjungur bæjarins grafist undir gjósku og hraun og framundan var hreinsun og uppbygging. Keyrð áfram af mikilli ástríðu og krafti sem hefur skilað þeim öfluga bæ sem Vestmannaeyjar eru.

Eins og áður á þessum tímamótum er upphaf gossins minnst með lágstemmdum hætti. Dagskráin hefst í Eldheimum kl. 01:45, nákvæmlega fimmtíu árum frá upphafi gossins þegar nemendur tíunda bekkjar lesa upp valið efni úr RÚV sem flutt var fyrsta sólarhringinn eftir gosupphaf. Lestrinum er streymt.

Á hádegi er hátíðarfundur í bæjarstjórn þar sem forseti Íslands, Guðni Th. Jóhannesson verður meðal gesta.

Klukkan 16.00 verður opnuð vinnustofa um handgerðar veifur á Bókasafninu. Hálftíma seinna verða nemendur í leikskólum og Grunnskólanum með sýningu í Sagnheimum.

Kl. 18.30 er safnast saman við Landakirkju og kl. 19:00 er lagt af stað að Eldheimum þar sem verður hátíðarviðburður. Þar flytja forseti Íslands Guðni Th. Jóhannesson, Katrín Jakobsdóttir forsætisráðherra og Páll Magnússon forseti bæjarstjórnar ávörp. Helga Bryndís píanóleikari og Silja Elsabet söngkona koma líka fram.

Bæjarbúar og gestir eru beðnir um að fjölmenna og minnast með því þessa einstaka viðburðar í sögu Vestmannaeyja, Íslands og heimsins alls.

Mynd Svavar Steingrímsson.