Bæjarráð Vestmannaeyja ræddi – á fundi ráðsins í vikunni – ramma og forsendur fjárhagsáætlunar. Fram kemur í fundargerð að undanfarnar vikur hafi vinna staðið yfir á bæjarskrifstofum Vestmannaeyja við að skoða áhrif breytingar á álagningarprósentu fasteignaskatts á tekjur bæjarsjóðs. Bæjarstjóri fór yfir vinnuna sem unnin var fyrir bæjarráð og þá tillögu sem liggur fyrir.

Í afgreiðslu ráðsins segir að bæjarráð leggi til við bæjarstjórn að álagningarprósenta fasteignaskatts á íbúðarhúsnæði lækki á milli ára úr 0,250% og verði 0,235% (A flokki), hlutfallið verði óbreytt á opinberar stofnanir (B flokki), þ.e. 1,320% og að hlutfallið lækki úr 1,350% í 1,325% á annað húsnæði (C flokki), þ.m.t. atvinnuhúsnæði. Með þessu verður dregið úr áhrifum hækkunar fasteignamats á íbúa og fyrirtæki í Vestmannaeyjum.

Bæjarráð leggur til þá breytingu á innheimtu fasteignagjalda að endurálagning verði gerð í júní ár hvert á alla flokka (A-B-C). Afsláttur af fasteignagjöldum einstaklinga verður endurreiknaður miðað við skattframtal ársins á undan. Er þetta breytt verklag við að endurskoða álagningu þar sem álagningin er endurreiknuð hjá öllum, ekki eingöngu hjá þeim sem þess óska.