Hermann Hreiðarsson, knattspyrnukappi skrifar undir lánssamning hjá enska B-deildarliðinu Coventry í dag en Hermann hefur fengið fá tækifæri hjá B-deildarliðinu Portsmouth í vetur. Coventry er í neðsta sæti deildarinnar og því ærið verkefni framundan. „Þetta leggst stórvel í mig enda fæ ég að spila fótbolta og það er það sem málið snýst um, að fá að spila. Fyrst stjórinn valdi alltaf vitlaust lið verður maður að gera eitthvað í hlutunum sjálfur,“ sagði Hermann að vanda léttur í bragði í samtali við Morgunblaðið.