- Eyjafréttir
- ·
- Almennt
- ·
Tilboð Stillu í Vinnslustöðina útrunnið
Tilboð Stillu í allt hlutafé Vinnslustöðvarinnar í Vestmannaeyjum, rann út klukkan 16 í dag. Ekki liggur fyrir hve margir hluthafar hafa samþykkt tilboðið.
Barátta um eignarráð yfir Vinnslustöðinni hefur staðið yfir síðan í vor en um miðjan apríl gerðu heimamenn, sem samtals eiga ríflega helmingshlut í Vinnslustöðinni, yfirtökutilboð í félagið á genginu 4,6. Í lok maí gerði félagið Stilla ehf. tilboð í allt hlutafé Vinnslustöðvarinnar á genginu 8,5. Fyrir þremur vikum síðan höfðu eigendur um 1% hlutafjár samþykkt tilboð Stillu.
Stilla er næststærsti hluthafinn í Vinnslustöðinni en félagið er í eigu bræðranna Guðmundar og Hjálmars Kristjánssona, sem kenndir eru við Brim. Þrátt fyrir mun hagstæðara tilboð Stillu vilja heimamenn ógjarnan selja og óttast að Vinnslustöðin verði leyst upp og einingarnar seldar frá Eyjum.
