Hermann Hreiðarsson skoraði síðara mark Portsmouth sem vann góðan útisigur á Fulham, 2:0, í ensku úrvalsdeildinni í knattspyrnu í dag. Með sigrinum renndi Portsmouth sér uppí fimmta sæti deildarinnar og hefur nú skorað næstflest mörk allra liðanna.

Benjani Mwaruwaru kom Portsmouth yfir á 50. mínútu og þremur mínútum síðar bætti Hermann Hreiðarsson við marki, 2:0, eftir mikinn sprett upp vinstri kantinn og samleik við Nico Kranjcar.

Hermann fór síðan af leikvelli þegar þrjár mínútur voru til leiksloka.

Fulham er með þessum úrslitum dottið niður í fallsæti deildarinnar með 7 stig en fyrir neðan eru Bolton og Derby með 5 stig hvort.