Atskákmót til minningar um Bedda á Glófaxa fer fram laugardaginn 11. maí 2019 kl. 12.00-19.00 í húsnæði Þekkingar-seturs Vestmannaeyja 2. hæð (vesturhúsi Fiskiðjunnar) að Ægisgötu 2, Vestmannaeyjum. Bergvin Oddsson skipstjóri og útgerðarmaður lést 22. sept. sl. 75 ára að aldri. Beddi var til margra ár virkur í skáklífinu í Eyjum og í hópi öflustu bakhjarla Taflfélags Vm. Bergvini og minningu hans til heiðurs var ákveðið efna til sérstaks skákmóts í samstarfi við fjölskyldu hans og til styrktar skáklifinu í Eyjum.
Atskákmótið hefst kl. 12.00 á hádegi á laugardaginn 11. maí og verða tefldar 8 umferðir eftir atskákformi, 15. mín. á skák og + 5 sek á leik. Eftir fjórar umferðir verður tekið kaffihlé og síðan taka við aðrar fjórar umferðir. Reiknað er með að mótinu ljúki um kl. 19.00 um kvöldið, úrslit kynnt og veitt vegleg verðlaun. Fyrstu verðlaun verða 200 þús. kr., 2. verðlaun 125 þús. kr. og 3ju verðlaun 75 þús. kr. Kristján Örn Elíasson aðal skákdómari á Reykjavíkurmótinu verður mótsstjóri. Skráningu á mótið lýkur á fimmtudaginn 9. maí kl. 16.00, en nú þegar hafa 40 keppendur skráð sig á mótið og eru þeir í öllum styrkleikaflokkum allt frá 10 ára aldri og þar á meðal nokkrir stórmeistarar í skák. Ekkert mótsgjald Áhorfendur velkomnir á keppnisstað sem verður á opna svæðinu í Þekkingarsetri Vm. Skráning á mótið er á skák.is
Meirihluti keppenda kemur með Herjólfi frá Landeyjahöfn kl. 10.45 (mæting 30 mín. fyrr) og frá Eyjum að loknu móti kl. 22.00 um kvöldið, en sumir koma fyrr eða dvelja lengur.
Frétt frá TV.
