Ólöf Aðalheiður Elíasdóttir, Óla Heiða, er heilsuþjálfari og leiðtogi í Janusar-verkefninu í Eyjum. Rætt var við hana í síðasta tölublaði Eyjafrétta.

„Ég fylgdist með Janusi meðan hann var að vinna að  doktorsrannsókn sinni um þjálfun eldra fólks, styrktarþjálfun og þolþjálfun. Hafði samband við hann og vildi svo vel til að Þór Vilhjálmsson, formaður Félags eldri borgara í Vestmannaeyjum var búinn að hafa samband við Janus og biðja um kynningu,“ segir Óla Heiða sem kynnti sér starfið nánar. Í samráði við Þór var verkefnið kynnt bæjarfulltrúum. Í framhaldi af því var ákveðið að taka verkefnið til Eyja og halda kynningu fyrir 65 ára og eldri,“ segir hún. 

Hugsa um heilsuna og æfa reglulega

Sérðu mun á iðkendum? „ Já, allir hafa bætt  styrk og þol og hreyfifærni hefur aukist mikið ásamt því að almenn líðan er betri. Við erum með reglulegar mælingar á ýmsum grunnþáttum líkamlegrar heilsu. Í þeim höfum við getað bent fólki á að fara til læknis og láta fylgjast með t.d. blóðþrýstingi og hækkun blóðsykurs. Þátttakendur fá  viðtal einu sinni á ári við sérfræðinga hjá Janusi heilsueflingu þar sem farið er yfir áhættuþætti efnaskiptavillu og fengnar leiðbeiningar um heilbrigðan lífstíl. Það er líka mikil fræðsla hjá okkur um næringu og ég sé að fólk er mun fróðara og meðvitaðara um hvað er hollt og gott fyrir líkamann.“ 

Í vetur byrjuðu þau þjálfun hjá Dagdvölinni Bjargi. „Tvisvar í viku kemur þjálfari frá okkur og sér um styrktarþjálfun en starfsfólkið sér um þolþjálfunina með því að fara í göngur um húsið. Við sjáum mikinn mun á fólkinu eftir fimm mánaðar þjálfun.“ 

Vinnan okkar að hugsa um heilsuna

Spurð um hvað hún vilji segja við þá eldri borgara sem ekki eru enn komnir í verkefnið, segir Ólöf að hún hvetji bara alla til að hugsa vel um heilsuna og hreyfa sig reglulega a.m.k. 30 mínútur á dag. „Hafa hreyfinguna fjölbreytta, helst að stunda styrktaræfingar 2 til 3 sinnum í viku. Þegar við förum að eldast er það vinnan okkar að hugsa um heilsuna og æfa reglulega, hvort sem það er hjá Janusi heilsueflingu eða annars staðar. Við höfum tekið á móti öllum sem hafa sótt um að koma æfa með okkur. “ 

Þá bendir Ólöf á að ef fólk hefur áhuga á að æfa með þeim er hægt að fara inn á heimasíðuna hjá Janusi heilsueflingu eða hafa samband beint við þau sem þjálfa í Eyjum.

„Ásamt mér eru Eygló Egilsdóttir og Erlingur Richardsson með mér þessa stundina en í vetur voru Erla Rós Sigmarssdóttir og Gísli Hjartarson einnig að þjálfa með okkur,“ segir Ólöf Aðalheiður Elíasdóttir. 

https://eyjar.net/god-heilsa-ekki-sjalfgefin-2/