Guðjón Hjörleifsson fyrrverandi bæjarstjóri og alþingismaður opnaði í morgun fyrirtækið Heimaey ehf þjónustuver að Bárustíg 1. Guðjón sem er löggiltur fasteigna- og skipasali að mennt mun vera með fasteigna- og skipasölu ásamt því að hann mun vera með umboð fyrir Vörð tryggingafélag. Eyjar.net tóku púlsinn á Gaua bæjó.

“Ég hef verið í áhættustarfi frá árinu 1990 að undanskildu rúmu ári þegar ég var útibústjóri Sjóvá Almennra hér í Eyjum. Þegar maður lendir í þeirri stöðu að hætta í pólitíkinni þá er gott að staldra við. Fyrsta ákvörðun mín og fjölskyldunnar var, hvar viljum við búa. Og svarið var mjög einfalt. Við viljum búa hér í Eyjum, hér eru fjölskyldur okkar, vinir og annað frábært fólk. Maður sem hefur verið í pólitík getur ekkert gengið sjálfkrafa að einhverju starfi. Ég er menntaður fasteignasali og því var það spennandi að prófa að vera sjálfstæður atvinnurekandi og einnig að kanna hvort ég geti ekki unnið á venjulegum vinnutíma og átt fleiri stundir með fjölskyldunni og sinnt áhugamálum í mínum frítíma. ” Guðjóni bauðst vel launuð vinna í Reykjavík en það freistaði hans ekki að flytja frá Eyjum. “Það verður síðan að koma í ljós hvernig Eyjamenn taka mér í mínu nýja starfi og vonandi er ég kominn til að vera í Eyjum.”

Markaðurinn þolir vel þrjár fasteignasölur
Er ekki bjartsýni að opna þriðju fasteignasöluna í Eyjum?
“Það er tvennt ólíkt að fara einvörðungu í fasteignabransann, eða koma skynsamlega inn og hafa jafnframt tryggingarnar með. Með stofnun fasteignasölunnar minnar er einungis verið að fjölga um hálft til eitt stöðugildi og á meðan hefur fasteignaverð hækkað um 50 – 80 % , þannig að veltan á markaðnum þolir alveg þessa viðbót.” Aðspurður hvað verði öðruvísi segir Guðjón að stærsti munurinn verði sú nálægð sem hann hefur við viðskiptavininn. “Ég er vel staðsettur, á jarðhæð og eins mun ég leggja áherslu á persónuleg tengsl við mína viðskiptavini.” Hækkandi fasteignaverð í Eyjum kemur Guðjóni ekki á óvart. “Ég sagði fyrir tveimur árum að fasteignaverð myndi hækka, og hafði orð á því að það væri hagstætt að fjárfesta í blokkaríbúðum og áhættan mjög lítil. Sjálfum fannst mér það ekki passa í stöðu þingmanns að fara að fjárfesta og leigja á markaðnum. Það er svo margt jákvætt sem spilar inn í breytingar á fasteignamarkaði. Það sem vegur mest er að fólk sé jákvætt og hafi trú á því samfélagi sem það býr í og ætlar að búa hér áfram. Síðan má segja að stórhugur útgerðarmanna með því að fjárfesta í nýjum glæislegum skipum og salan á eignarhlut bæjarins í Hitaveitu Suðurnesja hafði svipuð áhrif á bæjarsálina hér í Eyjum eins og álverið fyrir austan hafði á Austfirðinga. Síðan finnst mér mikil jákvæðni á stjórnendum bæjarins og mér finnst vera mikil samstaða vera milli meiri- og minnihluta.” Eins segir Guðjón að bjartari tímar séu framundan þegar búið er að eyða óvissu í samgöngumálum. “Við höfum verið mjög ósamstíga í samgöngumálum. Það er kannski eðlilegt. Það er sama hvort það er hjá manni persónulega eða því samfélagi sem maður býr í, þá er óvissan mesti óvinur manns. Um leið og óvissuni er eytt, þá er það okkar sem hér viljum búa að vinna saman úr því verkefni sem framundan er í okkar samgöngumálum. Við vitum hvað við höfum og við vitum hvað við fáum. Ef við notum tækifærið og förum að vinna saman þá eru ótal tækifæri framundan, og þá er ljóst að íbúðaverð í Eyjum mun halda áfram að hækka.”

Traustur sökkull til að byggja á
Ásamt því að vera með fasteigna- og skipasölu hefur Guðjón tekið við umboði fyrir Vörð tryggingafélag en hvernig kom það til? “Það var félagi minn sem ég hef starfað mikið með, sem frétti af því að ég væri að huga að stofnun fyrirtækis í Eyjum, sem hafði frumkvæði í þessu máli. Núverandi forstjóri Varðar tryggingafélags er Guðmundur J. Jónsson, en hann var aðstoðarframkvæmdarstjóri Sjóvá Almennra þegar ég var ráðinn þar. Vörður hefur verið að fá fleir viðskiptavini í Vestmannaeyjum og það eru töluvert fleir í viðskiptum við þá hér í Eyjum en ég átti von á. Það er því gott að byrja með traustan sökkul sem hægt er að byggja á. Það er einnig mikilvægt þegar maður tekur að sér umboð, að þekkja þá sem stjórna félaginu og það hafði mikil áhrif á þá niðurstöðu sem nú liggur fyrir, enda þessi fyrstu samskipti byggð á gagnkvæmu trausti.”

Einfaldar og öruggar tryggingar á viðráðanlegu verði
Hvernig tryggingafélag er Vörður?
“Vörður er tryggingafélag í eigu Landsbankans, Byrs-sparisjóðs og SP-fjármögnunar, þannig að það eru mjög sterkir sem koma að þessu og baklandaið þar af leiðandi mjög gott. Stjórendur Varðar og starfsmenn eru aðilar sem hafa starfað lengi á tryggingamarkaðnum og hafa mikla reynslu. Þeir þekkja markaðinn vel. Þeirra áherslu eru jafnar hvað varðar einstaklinga eða fyrirtæki. Þeir bjóða upp á einfaldar og öruggar tryggingar á viðráðanlegu verði. Þeir meta hverju sinni hvernig tryggingavernd hver aðili þarf og leggja mikið upp úr því að verð sé hagstætt og standist samanburð við samkeppnisaðilana.”

Viðskiptavinurinn hagnast á samkeppni
Fyrir í Eyjum eru þrjú umboð tryggingarfélaga. Erfið samkeppni framundan?
“Öll samkeppni er til góðs ef hún er heiðarleg. Það er viðskiptavinurinn sem hagnast á því að það er slegist um að fá hann til sín. Það er rétt að þrjú umboð tryggingafélaga eru hér í Eyjum, en það má ekki gleyma því að Vörður var kominn inn á Eyjamarkaðinn, ekki síst vegna þess að þeir hafa traust og eru að bjóða tryggingar á hagstæðu verði. Það mikilvægasta fyrir einstaklinga og fyrirtæki er snýr að samskiptum við tryggingafélög er þrennt að mínu mati. Í fyrsta lagi að það sé tryggingafélag og umboðsmaður á staðnum þar sem samskipti byggjast á gagnkvæmu trausti. Í öðru lagi þá þarf traustið að byggjast á því að hagsmunir tryggingaaðilans byggjist á öruggri tryggingavernd á sanngjörnu verði og í þriðja lagi þá verða tryggingagjöld að vera sanngjörn. Því lægri sem tryggingagjöld eru, því meira hefur fjölskyldan eða fyrirtækið meiri ráðstöfunartekjur í annað.”

Stefnir á þrjú stöðugildi
Guðjón mun starfa einn á skrifstofunni til að byrja með en markmiðin eru skýr. “Markmiðið er að breyta fyrirtækinu úr eins manns fyrirtæki í stærra og öflugra fyrirtæki. Annars vegar að styrkja það sem fyrir er og hins vegar að vera opinn fyrir annarri þjónustu fyrir bæjarbúa. Ég hvet aðila til að koma að máli við mig hafi þeir hugmyndir um eitthvað sem vantar í bæinn. Ég ákvað að fara í stórt og glæsilegt húsnæði að Bárustíg 1, hjá Grétari og Áslaugu. Ég hef fjárfest í innréttingum miðað við að hér verði að minnsta kosti þrjú stöðugildi til framtíðar. Ég verð að viðurkenna að ég er ekki týpan í að starfa einn, ég er félagsvera að eðlisfari, og þess vegna eru tvær ástæður fyrir þessari framtíðarsýn minni.”

Staða samfélagsins ekki betra í langan tíma
Guðjón er bjartsýnn á framhaldið í Eyjum. “Persónulega finnst mér staða Vestmannaeyja og samfélagsins ekki hafa verið betri í langan tíma. Við erum sjálf oft ábyrg fyrir umræðunni, og því er jákvæðni og samtakamátturinn mikilvægur. Það komu mikil tækifæri með sölu hlutabréfanna í Hitaveitu Suðurnesja uppp á 3,6 milljarða og það er mikil ábyrgð lögð á núverandi og verðandi bæjarstjórnir að vinna úr því, og ég er sannfærður um að þeir hafa tekið réttar ákvarðanir strax í því máli. Bæjarsjóður er ekkert annað en sameignlegur sjóður okkar sem búum hér. Sterk staða bæjarstjóðs, atvinnulífs og bættar samgöngur gefa ekkert en gott tilefni til þess að vera bjartsýnn á framtíðina,” sagði Guðjón að lokum.

Eyjar.net óska honum til hamingju með nýja fyrirtækið.