Eyjamenn unnu mikilvægan sigur á ungmennaliði Selfoss í kvöld þegar liðin áttust við í Eyjum. Það var kraftur í gestunum í upphafi leiks þegar þeir komust tveimur mörkum yfir strax í byrjun en Eyjamenn náðu fljótt tökum á leiknum. Reyndar var krafturinn fullmikill í hinu unga Selfossliði því sauma þurfti Grétar Þór Eyþórsson, leikmann ÍBV nokkur spor eftir kjaftshögg frá einum Selfyssingnum. En Eyjamenn unnu að lokum tveggja marka sigur, 25:23 eftir að hafa verið 15:11 yfir í hálfleik.