- Eyjafréttir
- ·
- Fréttir
- ·
Tekist á um úthlutun á kvóta þar sem veiðireynsla var sniðgengin
Mál Ísfélagsins og Hugins ehf. gegn íslenska ríkinu, til viðurkenningar á bótaskyldu ríkisins vegna ákvörðunar Jóns Bjarnasonar, þáverandi sjávarútvegsráðherra um úthlutun makrílkvóta árið 2011, voru tekin fyrir í Héraðsdómi Reykjavíkur á mánudag.
Málunum var báðum frestað til hausts að beiðni lögmanna útgerðanna. Málin voru höfðuð í maí síðastliðnum til viðurkenningar á bótaskyldu ríkisins vegna ákvörðunar sjávarútvegsráðherra um að ráðstafa aðeins hluta heildarmakrílaflans til skipa sem höfðu samfellda veiðireynslu á árunum 2008 til 2011.
Frá þessu er sagt í Morgunblaðinu en útgerðirnar telja skip sín hafa uppfyllt lagaskilyrði um samfellda veiðireynslu og því hafi ráðstöfun ráðherra verið ólögleg. Honum hafi borið að taka tillit til veiðireynslu skipanna og deila út kvóta í samræmi við lagaákvæði um takmörkun veiða á deilistofnum að því er fram kemur í umfjöllun Morgunblaðsins.
Umboðsmaður Alþingis staðfesti í áliti sínu frá árinu 2012 að ákvörðun ráðherra um að hlutdeildarsetja ekki makrílinn frá árinu 2011 hefði ekki verið í samræmi við lög, skip sem stunduðu veiðar á makríl á árunum 2008 til 2011 hefðu samfellda veiðireynslu í skilningi laga.
Um mikla hagsmuni er að ræða bæði í tekjum og atvinnu og var það skaði fyrir fyrirtæki Vestmanneyjum, sem eru frumkvöðlar í makrílveiðum og vinnslu þegar ráðherra ákvað að úthluta makríl til skipa og báta sem enga veiðireynslu höfðu.
Nýjustu fréttir
Mest lesið
