Ráðstefnan Lagarlíf fór fram í Hörpu dagana 29. og 30. september. Laxey var meðal þeirra fyrirtækja sem sóttu ráðstefnuna í ár.

Þar kom saman fólk úr fiskeldi og tengdum greinum til að miðla þekkingu, deila reynslu og efla tengsl.

Lárus Ásgeirsson, stjórnarformaður Laxey, flutti erindi um vegferð fyrirtækisins frá hugmynd að framleiðslu. Í erindinu fjallaði hann um árangurinn hingað til og þau tækifæri sem fram undan eru, að því er fram kemur í færslu fyrirtækisins.

Ráðstefnan leiddi saman fólk sem starfar meðal annars við eldi fisks, skelfisks og þörunga. Meðal þátttakenda var einnig fagfólk á sviði vinnslu, markaðs- og sölumála, þjónustu, rannsókna og þróunar.