Hljómey og Vestmannaeyjabær hafa undirritað áframhaldandi samstarfssamning til næstu þriggja ára. Samstarfið hefur staðið yfir undanfarin þrjú ár og verður því haldið áfram næstu þrjú árin.

Í tilkynningu frá Hljómey kemur fram að mikil ánægja sé með samstarfið við Vestmannaeyjabæ og að áframhaldandi stuðningur skipti starfsemi Hljómeyjar miklu máli.

Í nýja samningnum fær Barna Hljómey formlegri sess og stefna aðstandendur hátíðarinnar að því að efla dagskrána enn frekar.

„Þetta skiptir Hljómey öllu máli og ekki síst Barna Hljómey, sem fær núna sérstakan og formlegan stað í hjörtum okkar,“ segir meðal annars í tilkynningunni.

Þá gefa aðstandendur Hljómeyjar jafnframt fyrirheit um frekari tíðindi í nóvember. Undirbúningur virðist þegar vera kominn vel á veg og segir í tilkynningunni að mikið hafi verið um símtöl, tölvupósta og samtöl að undanförnu.