Í síðasta mánuði var greint frá því að bæjarráð Vestmannaeyja hefði samþykkt samhljóða að taka tilboði Terra í sorphirðu og förgun. Venjan er sú að fagráðið fjalli fyrst um mál sem þessi, sem í þessu tilfelli er framkvæmda- og hafnarráð og í kjölfarið fer málið fyrir bæjarráð.

Spurður um ástæður þess að svo var ekki í þessu tilfelli segir Brynjar Ólafsson, framkvæmdastjóri umhverfis- og framkvæmdasviðs að sorpmálin heyri undir framkvæmda- og hafnarráð en fjárhagslegar skuldbindingar heyri undir bæjarráð og olli röð funda því að þetta koma svona fram.

Tilboð Kubbs dæmt ógilt

Málið var svo tekið fyrir hjá framkvæmda- og hafnarráði nú í vikunni og fór Brynjar Ólafsson, framkvæmdastjóri yfir tilboðin þar. Fram kemur í fundargerðinni að þrjú tilboð hafi borist, en eitt þeirra var dæmt ógilt.

Tilboðin tvö sem eftir stóðu og getið er á um í fundargerðinni eru annars vegar frá Terra, sem hljóðaði upp á kr. 242.334.492,- og hins vegar frá Íslenska Gámafélaginu upp á kr. 339.556.000,. Kostnaðaráætlun var kr. 262.680.500,-.

Þá segir að bæjarráð hafi fyrir sitt leyti samþykkt tillögu framkvæmdastjóra að taka tilboði Terra og lagði framkvæmdastjóri einnig til við framkvæmda- og hafnarráð að taka tilboði Terra. Ráðið samþykkti fyrir sitt leyti tilboð Terra og fól framkvæmdastjóra að ganga frá samningi.

Synjað um að fá tilboðin

Eyjafréttir óskuðu eftir að fá tilboðin send en því var hafnað og sagði Brynjar Ólafsson í samtali við Eyjafréttir að tilboðsskrá innihaldi viðkvæmar fjárhagsupplýsingar sem óheimilt sé að birta opinberlega samkvæmt lögum um opinber innkaup. Spurður um hvers vegna tilboði Kubbs hafi verið hafnað segir Brynjar að tilboðið hafi verið metið ógilt þar sem ekki var gefið einingarverð í alla liði tilboðskráar.