Senn líður að kosningum, og við í Framsókn höfum lagt okkur fram um að vera traustur bandamaður í framþróun Vestmannaeyja. Með samvinnu og skýrum markmiðum höfum við náð árangri í málum sem skipta samfélagið hér lykilmáli.

Við upphaf kjörtímabilsins lögðum við áherslu á að rafvæða Herjólf, tryggja að stjórn hans væri í höndum heimamanna frekar en utanaðkomandi aðila, tryggja að sama gjald yrði frá Þorlákshöfn og Landeyjahöfn og greina þörf úrbóta í Landeyjahöfn. Þessi verkefni hafa tekist vel en enn er verk að vinna. Framundan eru mikilvæg verkefni sem geta umbylt samgöngum til Vestmannaeyja. Nýlega tók ég á móti niðurstöðum starfshóps sem ég setti af stað til að kanna fýsileika jarðganga til Vestmannaeyja. Hópurinn lagði til  þrepaskiptar rannsóknir á jarðlögum. Þetta eru sannarlega góðar og jákvæðar fréttir sem veita mér þá von í brjósti en samgöngur eru baráttumál mitt eins og þið þekkið, að nú hylli í áhugaverðan kost sem gæti bætt samgöngur svo um munar og gert búsetu í Vestmannaeyjum enn hagstæðari.

Á sama tíma og slík göng myndu að öllum líkindum gjörbylta samgöngum og auðvelda innviðauppbyggingu, svo sem í vatnsveitu, raforkuflutningi og ljósleiðaratengingum þá er alveg ljóst að slíkt verkefni krefst vandaðrar greiningar og samstöðu. Því er mikilvægt að horfa til þessa möguleika af alvöru og að fyrsti áfangi fari af stað sem fyrst.

Við trúum því að þessi skref, ásamt áframhaldandi vinnu, muni styrkja samfélagið og auðvelda bæði daglegt líf íbúa og þróun atvinnulífs á svæðinu til framtíðar.

Vatnsöryggi og grunnstoðir samfélagsins

Í því samhengi viljum við nefna mikilvægi almannavarnavatnslagnar til eyjanna, sem hefur verið eitt af áherslumálum Framsóknar. Fjármagn hefur verið tryggt til verksins með aðkomu ríkisins. Vatnsöryggi er undirstaða samfélagsins.

Heilbrigðisþjónusta sem stendur undir væntingum

Á sviði heilbrigðismála höfum við einnig náð árangri. Í dag koma fleiri sérfræðingar reglulega til eyja en áður og kostnaður við þjónustu hefur verið lækkaður á ýmsum sviðum, sem skiptir miklu máli fyrir íbúa. Samt sem áður eru fram undan verkefni sem snúa að því að styrkja grunnþjónustu í heilbrigðismálum.

Heilbrigðisráðherra hefur þegar lagt áherslu á að koma á hvötum fyrir lækna og annað heilbrigðisstarfsfólk til að starfa utan höfuðborgarsvæðisins. Það næsta sem þarf að gera er að hrinda þessum hvötum í framkvæmd til að tryggja öryggi samfélagsins enn frekar. Þetta á ekki síst við um þjónustu við verðandi mæður, sem skiptir höfuðmáli fyrir fjölskyldur í Vestmannaeyjum.

Samfélag í fararbroddi

Við sjáum öflugt og samheldið samfélag Eyjamanna vera í fararbroddi á mörgum mikilvægum sviðum og leggja áherslu á að hlúa að sínu fólki. Verkefni á borð við Kveikjum neistann og Karlar í skúrum eru einstök dæmi um frumkvæði sem aðrir samfélagshópar gætu tekið sér til fyrirmyndar.

Æskulýðsstarf í Vestmannaeyjum er einnig til fyrirmyndar og hefur náð ótrúlegum árangri miðað við höfðatölu. Þetta sýnir hversu mikinn kraft og metnað Eyjamenn leggja í uppbyggingu framtíðarkynslóða. Þessi árangur hlýtur að vera metinn sem afrek í alþjóðlegu samhengi sem dæmi um það hvernig lítil, samheldin samfélög geta skarað fram úr.

Orkumál – sanngirni og öryggi fyrir alla

Við sjáum brýna þörf á að styrkja innviði í orkumálum til að tryggja öryggi og sanngirni fyrir bæði heimili og atvinnulíf. Mikilvæg skref hafa þegar verið tekin, meðal annars með samþykkt nýrrar kerfisáætlunar undir forystu nýs oddvita okkar í kjördæminu. Hún felur í sér nauðsynlegar flutningslínur sem Landsnet getur nú ráðist í. Þessar línur munu koma í veg fyrir skerðanlegan flutning sem hefur haft neikvæð áhrif á atvinnulíf og samfélög. Framsókn mun leggja mikla áherslu á framgang þessara framkvæmda.

Auk þess hefur hækkandi orkukostnaður valdið áhyggjum hjá heimilum um allt land. Hér þarf að endurskoða hitaveitulög með það að markmiði að bæta eftirlit, sem nú er á hendi ráðherra orkumála, og tryggja jafnvægi í kostnaði milli landsbyggðar og höfuðborgarsvæðis. Enn fremur er brýnt að gera nauðsynlegar lagabreytingar til að tryggja að almenningur hafi forgang á raforku. Þetta er lykilatriði í að draga úr þeim ójöfnuði sem landsbyggðin hefur lengi búið við.

Traust fyrir framtíðina

Við í Framsókn viljum halda áfram að láta verkin tala. Þið getið treyst því að við verðum áfram öflug rödd landsbyggðarinnar og munum vinna að því að tryggja bjarta framtíð Vestmannaeyja.

Sigurður Ingi Jóhannsson og Halla Hrund Logadóttir
Formaður Framsóknar og oddviti Framsóknar í Suðurkjördæmi