Eyjaskipin Bergey VE og Vestmannaey VE lönduðu bæði í Þorlákshöfn í gær. Rætt er við skipstjóranna á vefsíðu Síldarvinnslunnar. Þar eru þeir spurðir fregna af veiðiferðinni. Jón Valgeirsson á Bergey lét vel af sér. „Við hófum túrinn út af Sandgerði en þar var þokkalegt skjól. Síðan var haldið á Sannleiksstaði út af Þorlákshöfn og þar var fyllt. Aflinn var mjög blandaður; mest af karfa, síðan ýsa, langa og þorskur. Næst gerum við ráð fyrir að veiða fyrir austan. Það er semsagt Austfjarðaskurkur á dagskránni,” sagði Jón.

Birgir Þór Sverrisson á Vestmannaey sagði að áformað hefði verið að veiða fyrir austan en vegna veðurs hefði verið fallið frá því. „Við byrjuðum úti á Eldeyjarbanka og síðan kláruðum við túrinn á Selvogsbankanum. Það var engin kraftveiði en þetta mjatlaðist þokkalega og við vorum nánast með fullfermi. Helmingur aflans var karfi en síðan var þetta blanda af öðrum tegundum,” sagði Birgir Þór.

Að lokinni löndun í Þorlákshöfn héldu bæði skip til Eyja en áformað er að láta úr höfn í dag og halda austur á bóginn, segir en fremur í fréttinni.