Þann 17. febrúar 2023 tók Sigurjón Óskarsson, einn af kjölfjárfestum í Laxey, fyrstu skóflustunguna fyrir áframeldið í Viðlagafjöru. „Ég mokaði ekki miklu sjálfur, en það hefur verið mokað heilmikið síðan þá og það er í raun ótrúlegt hvað mikið er búið að gerast,“ er haft eftir Sigurjóni á facebook-síðu fyrirtækisins. Þar segir einnig að frá þeim degi hafi framkvæmdir þróast hratt og markvisst, í samræmi við upprunalega tímaáætlun.

Nú er fyrsti áfangi kominn í fullan rekstur og uppbygging á öðrum áfanga vel á veg komin. Öll átta kerin í áfanga tvö hafa verið reist og tæknileg uppsetning stendur yfir. Gert er ráð fyrir að fyrstu kerin fari í notkun í haust og að öll kerin verði komin í rekstur fyrir lok árs.

Uppbygging stórseiðahúss félagsins gengur vel og mun starfsemin hefjast fljótlega á öðrum ársfjórðungi. Með því eykst framleiðslugeta félagsins samhliða því sem rekstrarsveigjanleiki styrkist og áframhaldandi uppbygging fær aukinn kraft.

Nú þegar hafa fjórir seiðahópar verið fluttir frá seiðastöð fyrirtækisins í áframeldið og í þessari viku fer fram flutningur á þeim fimmta. Frá nóvember 2025 hafa jafnframt farið fram vikulegar slátranir á um fimm kílóa laxi sem gengið hafa mjög vel; gæði eru góð og viðskiptavinir ánægðir.

Á meðfylgjandi mynd heldur Sigurjón Óskarsson á sömu skóflu og notuð var við fyrstu skóflustunguna 17. febrúar 2023. Laxey stefnir á 5.000 tonna framleiðslu á árinu.