Fyrir þig en ekki sjálfa sig
Greinarhöfundur og Margrét Rós.

Aðsend grein

Kristinn Pálsson

Ýmsar manngerðir finnast í pólitík. Sumar hverjar birtast eins og páskaskraut rétt fyrir prófkjör, alveg glansandi glaðar en hverfa um leið og kosningakaffið kólnar. Aðrar skipta um ham eftir veðri og láta ekki sjá sig fyrr en vindar blása þeim í vil. Þá eru það þær sem með eintómu handapati hræra í loftinu einu saman og kallar það dagsverk, með klappi á baki. Svo er það Margrét Rós.

Því hún er engin eftirlíking og ekki er hún liðhlaupi. Margrét er blá inn að beini og fer ekki leynt með það. Hún hefur staðið með sínum flokki í gegnum súrt og sætt, meðan aðrir í villu vegar brugðu sér af bæ. Nei, hún Margrét er ekki þannig, því hún er eins í orði og á borði.

Ég kynntist Margréti vel í undirbúningsnefnd Goslokahátíðar. Við unnum saman um árabil að hátíðinni og fleiri góðum verkefnum síðar. Hún tók ekki við stjórn nefndarinnar til að hella upp á könnuna. Þvert á móti. Því eitt af hennar fyrstu verkum var að skera niður kaffisjóð sem áður hafði brauðfætt fyrra nefndarfólk. Bæjarbúar voru sko ekki að fara bruðla einhverju vínarbrauði í okkur „ekki bræðurna“ Kristinn og Hjalta Pálssyni. Það er einmitt í hennar anda að fara vel með annarra manna fé. Með Margréti var markmiðið alltaf að gera þrjár krónur úr hverri einni, virkja kraft einstaklingsins, fyrirtækjanna og endurskoða öll óþörf útgjöld hátíðinni í hag.

Já, þannig er Margrét. Hún berst fyrir verkefnum sem eru ekki henni persónulega til framdráttar. Með Hásteinsrokið í fanginu barst hún að innviðum á velli sem hún mun ekki hlaupa um sjálf, skipuleggur hátíðir þótt djamm sé ekki hennar te og stendur vörð um annarra börn. Því að vera Margrét snýst sko ekki um að sitja á háum hesti, rausa í ræðupúlti eða blása í lúðra sjálfri sér til dýrðar.

Fyrir fimm árum gekk hún í gegnum áfall sem barið hefði marga niður. En Margrét fékk annað tækifæri sem hún ætlar að nýta vel. Föstudaginn 13. mars færð þú þess vegna það tækifæri að tryggja áframhaldandi aðkomu hennar að bæjarmálunum. Settu því vinkonu mína Margréti Rós í 2. sæti í prófkjöri Sjálfstæðisflokksins í Vestmannaeyjum.

Hún er nefnilega í þessu fyrir þig en ekki sjálfa sig.

Kristinn Pálsson

Nýjustu fréttir

Íþróttir
Valur vann ÍBV í fyrsta leik í úrslitaeinvíginu
Íþróttir
The Puffin Run fór fram í dag í blíðskaparveðri
Úr blaði Eyjafrétta
Ástríðan fyrir trérennslu kviknaði í faraldrinum
Fréttir
Dýpkun gekk vel í morgun
Stjórnmál
Sjálfstæðisflokkur stærstur í Suðurkjördæmi
Mannlíf
Góð stemning á fjölskyldudegi á Stakkagerðistúni
Íþróttir
ÍBV mætir Val í fyrsta leik úrslita
Íþróttir
The Puffin Run hlaupið í níunda sinn á morgun
Mest lesið
viðburðir
Matey 2022
22. maí 2026
18:00
MATEY Seafood Festival

Góð ráð fyrir siglingu

Sjóveiki

Hvað er sjóveiki?

Sjóveiki er misræmi milli skynfæra líkamans sem senda boð til heilans um hreyfingu – kyrrstöðu.

Þegar einstaklingur er úti á sjó þá nema skynjarar í vökvafylltum gangi í innra eyra hreyfingu og senda boð til heilans að einstaklingur sé á hreyfingu. Augun senda hins vegar boð til heilans um að viðkomandi sé kyrr. Heilinn á erfitt með að vinna úr þessum misvísandi og ósamræmdu upplýsingum og sendir skilaboð til magans um að tæma sig – þ.e. veldur uppköstum.

Einkenni sjóveiki eru þreyta, ógleði, svimi, svitakóf og uppköst.

Góð ráð til að hindra sjóveiki:

  • Góð hvíld daginn fyrir brottför. Að fara seint að sofa og snemma um borð í bát fer ekki vel saman ef fólk er hætt við sjóveiki.
  • Forðist áfenga drykki daginn fyrir brottför
  • Forðist djúpsteiktan, brasaðan eða saltan mat daginn fyrir siglingu.
  • Borðið góðan morgunverð. Borðið gjarnan hvítt brauð, hafragraut og ávexti þó ekki sítrus ávexti.
  • Forðist mikið koffein. Mikið kaffi er ekki það sem maganum líkar fyrir sjóferð.
  • Hafðu mat með þér á sjó. Gott er að hafa samlokur með kjúklingi eða kalkún. Kjötið er fitusnautt og brauðið er róandi í maga. Hafðu endilega eitthvað til að grípa í sem er létt í maga. Bananar eru mjög góðir til að narta í ef þú finnur fyrir ógleði en einnig er gott að hafa létt kex eða annað sem er ekki salt eða fitumikið.
  • Drekkið vel af vatni en einnig er gott er að drekka kóla drykki eða engiferöl í sjóferðinni

Lyf við sjóveiki þ.e. lyf sem slá á einkennin og fást án lyfseðils í apóteki.

  • Koffínátín – fæst án lyfseðils
  • Postafen – fæst án lyfseðils
  • Scopolamin plástur – lyfseðilsskyltEinnig má fá armbönd gegn ferðaveiki sem sumir telja að hjálpi.

Önnur ráð:

  • Engifer er jurt sem nýlega hefur fengið aukna athygli vegna þess að því er haldið fram að hún geti slegið á ógleði sem fylgir sjóveiki. Til forna tuggðu kínverskir sjómenn engiferrót til að draga úr sjóveiki. Flest lyf sem virka á ógleði verka á heilann en engifer virkar aðeins á magann. Ráðlagt er að taka 1000 mg. hylki hálftíma fyrir brottför. Einnig má taka eitt eða tvö 500 mg. hylki sem eru til viðbótar á ferðalaginu. Ekki er ráðlagt að drekka coke með engifertöflum.
  • Piparminta og te eru einnig gömul húsráð við ferðaveiki.
  • Sumum finnst betra að taka sýrujafnandi töflur, Alminox eða slíkt áður en þú heldur á sjó og þá er gott að hafa box með út á sjó.

Hvar í skipinu er best að vera o.fl.

  • Minna finnst fyrir hreyfingu og veltingi ef maður er staddur næst miðju bátsins.
  • Mörgum finnst gott að vera í kulda, t.d.að vera úti á dekki og láta vindinn leika um sig.
  • Matarlykt fer illa í þá sem hætt er við sjóveiki og einnig pústið frá bátnum.

Þungun:

Þungaðar konur sem þjást af sjóveiki mega nota koffinátín í litlum skömmtum en best er að ráðfæra sig við lækni eða lyfjafræðing.
Þunguðum konum er ekki ráðlagt að nota engifer þar sem það er ekki staðfest hvort það geti haft skaðleg áhrif á fóstur.

Eyjafréttir
Keyrt af  GDPR Cookie Compliance
Friðhelgisyfirlýsing

Þessi vefsíða notar fótspor til að við getum veitt þér bestu notendaupplifun. Upplýsingar um fótspor eru geymdar í vafranum þínum og framkvæma aðgerðir eins og að þekkja þig þegar þú kemur aftur á vefsíðu okkar og hjálpa teymi okkar að skilja hvaða hluta vefsíðunnar þér finnst áhugaverðast og gagnlegast.