Kvennalið ÍBV í handbolta tryggði sér á dögunum sæti í úrslitum og mætir Val í dag. Leikurinn sem fer fram í N1-höllinni á Hlíðarenda hefst klukkan 15:00. Um er að ræða fyrsta leik í úrslitaeinvígi liðanna þar sem Íslandsmeistaratitillinn er undir.

Eins og fram hefur komið meiddist Amalia Frøland, markvörður ÍBV íí undanúrslitaleik liðsins gegn Haukum. Hún er með slitið fremra krossband í hné og verður hún ekkert með næstu mánuðina. Amalia hefur verið einn af bestu markvörðum Olís deildarinnar og er því ljóst að þetta er mikið áfall fyrir ÍBV. Ólöf Maren Bjarnadóttir er varamarkvörður liðsins en hún hefur átt frábærar innkomur í úrslitakeppninni og hjálpaði liðinu að komast í úrslitaeinvígið.

Handknattleiksdeild ÍBV hvetur stuðningsmenn til að fjölmenna á leikinn og skapa alvöru Eyjastemningu í stúkunni. „Þetta eru úrslit – þetta er stundin,“ segir í tilkynningu frá deildinni, þar sem lögð er áhersla á mikilvægi stuðnings úr stúkunni.