Metnaður, nýsköpun og jákvætt skólastarf voru í forgrunni þegar fræðsluráð Vestmannaeyja afhenti hvatningarverðlaun sín og úthlutaði styrkjum úr Þróunarsjóði leik-, grunn- og tónlistarskóla í Einarsstofu á miðvikudag. Fjöldi verkefna sem miða að auknu útinámi, skapandi kennslu og bættri námsupplifun barna hlaut stuðning að þessu sinni. Frá þessu var greint á vef bæjaryfirvalda í dag.

Fræðsluráð veitti að þessu sinni fjórum starfsmönnum hvatningarverðlaun fyrir framúrskarandi framlag til fræðslustarfs. Markmið verðlaunanna er að vekja athygli á því sem vel er gert í skólunum og draga fram það öfluga og mikilvæga starf sem unnið er á hverjum degi í þágu barna og ungmenna. Verðlaunahafarnir eiga það sameiginlegt að hafa með metnaði, fagmennsku og jákvæðu viðmóti lagt sitt af mörkum til að efla skólasamfélagið og skapa gott umhverfi til náms og þroska.

Jarl Sigurgeirsson – Söngur á sal

Jarl hefur um árabil sinnt söng á sal af miklum metnaði og gert hann að föstum og mikilvægum þætti í skólastarfinu. Með söngstundunum skapast vettvangur þar sem nemendur koma saman, njóta samveru og taka þátt í sameiginlegri upplifun sem eflir bæði gleði og samveru. Framlag Jarls hefur haft jákvæð áhrif á skólamenningu og styrkt samfélagsandann innan skólans.

Erla María Sigurgeirsdóttir og Gréta Guðný Snorradóttir –  kennsla elsta árgangs í Kirkjugerði

Erla María og Gréta Guðný hafa á skömmum tíma reynst afar verðmæt viðbót við starfsfólk Kirkjugerðis. Þær komu til starfa með góða reynslu úr leikskólaumhverfinu og hafa frá upphafi unnið af fagmennsku, krafti og jákvæðu viðmóti. Framlag þeirra hefur verið bæði sýnilegt og mikilvægt og með störfum sínum hafa þær stutt vel við starfsemi leikskólans og lagt sitt af mörkum til að efla gott og uppbyggilegt skólastarf.

Linda Óskarsdóttir, sérkennslustjóri á Víkinni

Linda er fyrirmyndarkennari sem mætir börnum af hlýju, fagmennsku og ríkri ábyrgðarkennd. Hún hefur einstaka hæfni til að greina þarfir barna og skapa öruggt og styðjandi umhverfi þar sem þau geta dafnað og notið sín. Þá er hún lausnamiðuð, úrræðagóð og sterkur leiðtogi sem styður samstarfsfólk sitt vel og leggur sig fram um að finna árangursríkar leiðir fyrir hvert barn. Framlag Lindu hefur verið bæði mikilvægt og eftirtektarvert í skólasamfélaginu.

Markmið Þróunarsjóðs leik-, grunn- og tónlistarskóla er að stuðla að framþróun og eflingu innra starfs í skólum Vestmannaeyjabæjar og hvetja starfsfólk til þróunar og nýsköpunar í skólastarfi. Með sjóðnum skapast hvati til nýrra verkefna sem auka fjölbreytni í skólastarfi og nýtast bæði starfsfólki og nemendum. Eftirtalin verkefni hlutu styrk að þessu sinni:

Drullueldhús á Sóla

Markmið verkefnisins er að koma upp aðstöðu á leikskólalóð Sóla þar sem börn fá tækifæri til að auka fjölbreytni í útinámi. Þar gefst þeim kostur á að kanna og upplifa náttúruna á skapandi og frjálsan hátt. Með verkefninu er leitast við að efla leik og nám með því að nýta náttúrulegan efnivið og hvetja börn til að prófa sig áfram, uppgötva og læra í gegnum leik. Að verkefninu standa Valgerður Jónu Þorsteinsdóttir, Guðrún Lilja Friðgeirsdóttir og Hildur Dögg Jónsdóttir.

Einfaldar tilraunir

Markmið verkefnisins er að nemendur taki þátt í einföldum tilraunum og öðlist skilning á því hvernig hlutir virka í raunveruleikanum. Jafnframt er leitast við að gera námið lifandi og áhugavert með því að gefa nemendum tækifæri til að prófa sig áfram og læra af eigin reynslu. Áhersla er lögð á að nemendur spyrji spurninga, velti fyrir sér niðurstöðum og útskýri það sem þeir sjá á sinn eigin hátt. Bryndís Bogadóttir stendur að verkefninu.

Bætt útinámsaðstaða

Markmið verkefnisins er að kynna börnum í Kirkjugerði nærumhverfi sitt og lífríki Vestmannaeyja á lifandi og áhugaverðan hátt. Jafnframt er leitast við að efla tengsl þeirra við náttúruna og samþætta hreyfingu og nám í daglegu starfi. Áhersla er lögð á að styrkja sjálfstraust, seiglu og vellíðan barna með því að gefa þeim tækifæri til að uppgötva og læra á eigin forsendum. Að verkefninu standa Gréta Guðný Snorradóttir og Erla María Sigurgeirsdóttir.