Kvennalið ÍBV í fótbolta sigraði Þór/KA, 2-0, í fjórðu umferð Bestu deildar kvenna á Hásteinsvelli í dag. Eyjakonur voru með mikla yfirburði í upphafi leiks en markvörður Þór/KA, Allesandra Doherty Augar, sá til þess að að fyrsta mark ÍBV kom ekki fyrr en eftir hálftíma leik. Olga geystist þá upp vinstri vænginn og kom boltann inn á teiginn og engin önnur en Allison Grace Lowrey setti boltann í netið og kom Eyjakonum í 1-0. Þannig stóðu leikar í hálfleik. 

Seinna mark ÍBV kom á 69. mínútu leiksins. Allison Patricia Clark átti þá langa sendingu yfir völlinn á Olgu sem kom boltanum á Erlu Hrönn Unnarsdóttur. Erla náði lítilli snertingu á boltann sem datt fyrir Olgu og hún kláraði af miklu öryggi fram hjá markverði Þór/KA. Lokatölur leiksins 2-0 og fjórði sigur ÍBV kominn í hús. Frábær byrjun hjá nýliðunum.

Eyjakonur eru á toppi deildarinnar með tólf stig en Þór/KA situr í níunda sæti deildarinnar með tvö stig. Leikur Stjörnunnar og FH fór fram á sama tíma þar sem FH fór með sigur af hólmi, 1-2. Umferðin klárast á morgun.

Næsti leikur ÍBV er útileikur gegn FH, þriðjudaginn 19. maí kl. 18:00.

ÍBV 2 – 0 Þór/KA

1-0 Allison Grace Lowrey (’30 )

2-0 Olga Sevcova (’69 )