Kjarnaborunin á Landeyjasandi vegna fyrirhugaðra Eyjaganga heldur áfram af fullum krafti. Um helgina hafði borinn náð 108,5 metra dýpi og jafnframt standa yfir hafbotnsmælingar í Eyjasundi sem eiga að varpa frekara ljósi á jarðfræðilegar aðstæður á fyrirhugaðri jarðgangaleið.

Samkvæmt upplýsingum á vef Eyjaganga hafði borinn náð 108,5 metra dýpi í gær, laugardaginn 11. júlí. Þá voru liðnir 22 dagar frá því fyrstu bergkjarnarnir komu upp á yfirborðið á Landeyjasandi. Markmið borunarinnar er að afla nákvæmra upplýsinga um jarðlög og berggæði á svæðinu, en þær upplýsingar eru grundvallarforsenda fyrir hönnun og framkvæmd fyrirhugaðra jarðganga milli lands og Eyja.

Fram kemur að gangur verksins á Landeyjasandi sé um margt sambærilegur þeirri kjarnaborun sem áður var framkvæmd í Vestmannaeyjum. Stefnt er að því að bora niður á allt að 300 metra dýpi áður en rannsókninni lýkur.

Samhliða kjarnaboruninni eru hafnar hafbotnsmælingar í Eyjasundi. Fyrstu mælingarnar fóru fram sunnudaginn 5. júlí og er talið að þær hafi náð um 300 metra niður undir sjávarbotn. Fram undan er umfangsmikil úrvinnsla gagnanna.

Veður og sumarleyfi hjá starfsmönnum Landhelgisgæslunnar hafa valdið nokkrum töfum á mælingunum, en samkvæmt því er segir í upplýsingum á vef Eyjaganga eru horfur góðar á að hægt verði að halda þeim áfram næstu daga, enda skiptir ölduhæð miklu máli fyrir gæði gagnasöfnunarinnar.