Knattspyrnudeild ÍBV hefur samið við bandaríska varnarmanninn Jessicu Hinton. Hún er 24 ára og kemur til Eyja frá SF Damaiense, sem leikur í efstu deild Portúgals.

Hinton segist lengi hafa stefnt að því að leika fyrir félag á borð við ÍBV og vera þakklát fyrir tækifærið.

„Að spila fyrir félag eins og ÍBV hefur lengi verið markmið hjá mér og ég er ótrúlega þakklát fyrir tækifærið, ekki bara til að spila fyrir félagið heldur einnig til að verða hluti af samfélaginu hér í Vestmannaeyjum,“ segir Hinton í tilkynningu knattspyrnudeildarinnar.

Sterkur ferill í bandaríska háskólaboltanum

Hinton lék þrjú tímabil með Brown University í bandaríska háskólaboltanum og hlaut þar meðal annars tvisvar sinnum All-Conference- og All-New England-viðurkenningar. Hún gegndi lykilhlutverki í einni sterkustu varnarlínu landsins en liðið fékk að meðaltali aðeins á sig 0,8 mörk í leik.

Árið 2024 lék hún með Vanderbilt University og var í byrjunarliði í öllum leikjum tímabilsins. Liðið fékk aðeins á sig 19 mörk og Hinton átti meðal annars stoðsendinguna sem tryggði Vanderbilt sæti meðal 16 bestu liða í bandaríska háskólaboltanum, í fyrsta sinn í sögu skólans.

Jessica Hinton er þegar mætt til Eyja og hefur hafið æfingar með ÍBV.